Tabal nag-una sa General Santos leg sa national Milo Marathon
CEBU, Philippines – Wala gihapon mahupas ang katakus ni Cebuana road running queen Mary Joy Tabal kini gumikan kay siya ang misakmit sa 21K women’s title sa General Santos City leg sa 39th National Milo Marathon niadtong Domingo.
Bisan pa og nakaangkon na siya og luna sa sunod National finals sa Disyembre didto sa Angeles Pampanga, si Tabal midagan gihapon sa GenSan leg isip iyang tune-up race.
Ang Southeast Asian Games silver medalist nga si Tabal didto midagan sa GenSan tungod kay wala siya kahigayon atol sa Cebu leg kay giatiman niya ang paggiya sa mga batan-ong sakop sa Cebu City Sports Commission grassroots program.
Ang 26-anyos nga si Tabal mitapos sa lumba sud sa usa ka oras, 21 minutos ug 42 segundos. Gipilde niya ang kanhi 21K champion sa GenSan leg nga si Mona Liza Ambasa nga mitapos sa ikaduha sa oras nga 1:35:03, samtang si Noemu Andrea Galeos mipahiluna sa ikatulo sa oras nga 1:52:44.
Sa men’s class, ang veteran nga si Juneil Languido maoy nag-una sa oras nga 1:14:04, gisundan ni Elmer Bartolo (1:16:47) ug Gilbert Maluyo (1:20:42) sa ikaduha ug ikatulong luna. (BANAT NEWS)
- Latest
