Lancers o Warriors?

CEBU, Philippines – Sa  katapusang  higayon, ang University of the Visayas Green Lancers ug ang University of San Carlos Warriors  magtiwas  alang  sa  ‘deciding match’  sa ilang  “best-of-five” collegiate division  finals sa  15th Cebu Schools Athletic Foundation, Inc. (CESAFI)  basketball tournament karong gabii diha sa Cebu Coliseum.

Ang pinaksitay sugdan sa alas-6 sa gabii.

Lima na ka sagunson nga katuigan nga milanat og Game-5 ang CESAFI finals ug ikatulo na kini sa Lancers gikan niadtong 2012 diin napilde sila sa Southwestern University Cobras, Apan nakabawos  ang Lancers ngadto sa Cobras niadtong 2013.

Karon sa 2015 finals, ang Warriors maoy midaog sa Games 1 ug 3, samtang ang Lancers miangkon sa Games 2 ug 4.

Midaog ang Warriors sa Game-1 sa iskor nga 76-70, samtang sa Game-3 sa iskor nga 87-76. Mibawos sab ang Lancers sa Game-2 sa iskor nga 70-63 ug  sa Game-4, 60-52 aron makapugos og Game-5.

Sikit ang resulta sa duha nila ka daog diin adunay 17 puntos nga winning margin ang Warriors ug may 15 puntos nga winning margin ang Lancers, busa dili sab kahibudngan nga sikit sab karon ang Game-5.

Ang Lancers ni coach Gary Cortes, kinsa adunay bentaha sa ilang championship experience, adto lang gihapon mosandig sa ilang import nga si Steve Cedrick Akomo uban sa ilang mga pambatong local players nga naglakip  nilang June Kent Manzo, Francisco Arong, Alfred Codilla, Leonard Santillan, Arvie Cabaneor ug Alwyn Aguirre.

Sa habig sa Warriors, si coach Britt Reroma malaumon gihapon sa maayong opensa sa ilang import nga si Shooster Olago uban  nilang Ian Jefferson Tagapan, Nico Magat, Ian Ortega, Victor Rabat, Charles Pepito ug Kiefer Lim.

Sa Game-4 diin kinahanglan lang unta modaog ang Warriors aron magsaulog sa labing una nilang titulo sukad niadtong 1958, napugngan si Olago ngadto lang sa siyete puntos gikan sa 32 puntos sa Game- 3.

Wala sab makaarte si Tagapan hinungdan sa ilang kapildihan.

Mao na kini ang ikaupat nga higayon nga miabante sa finals ang Warriors lakip ang ‘back-to-back’ finals appearances niadtong 2005 ug 2007 ug  sa 2014 ug 2015. (BANAT NEWS)