Lahug, Mactan abante sa finals

CEBU, Philippines - Nakuha sa Duty Free-Lahug ang katapusang lingkoranan sa finals human modaog sa kutas nila nga duwa batok sa Duty Free-Warehouse, 47-42 sa 4th Duty Free Sportsfest 2015 basketball tournament niadtong Martes sa gabii didto sa Mabolo National High School gym (kanhi Florencio Urot).

Harungon sa Duty Free-Lahug sa finals ang Duty Free-Mactan, kinsa miabante sab sa championship round human nila gitagak ang kanhi wa’y pildeng Duty Free-SM pagdaog, 52-47.

Ang tulo parehong nagbitbit og 2-1 win-loss records, apan ang panagtabla gibuak pinaagi sa Olympic quotient system nga nakabulabog sa Duty Free-SM.

Si Richie Ebardo maoy highest pointer sa Duty Free -Lahug pinaagi sa iyang 11 puntos. Ang playing coach nga si  Isagani Tajo ug ang iyang anak nga si Carl Tajo ug ingon man si Marvin Evangelista parehong mikadlit og singko puntos alang sa Duty Free-Lahug nga mipatuman og “trapping defense’ sa hinapos nga bahin sa fourth period aron mabuntog ang mas tag-as nga  Duty Free-Warehouse.

Naglisud ang Duty Free-Lahug  gikan sa pagsugod sa duwa ug kanunay sab kining naggukod, apan sa tanto nilang paningkamot nilabaw sila sa labing unang higayon, 29-28 sa nahabiling 46 segundos sa third quarter kortesiya sa 3-point play ni Jhong Nayon.

Mihulga ang Warehouse sa katapusang dos minutos sa duwa, 37-41, apan si Gani Tajo mikompleto sa iyang three-point play aron bingaton og balik ang ilang labaw, 44-37.

Si Miggy Cuttillar maoy nangu sa Warehouse pinaagi sa iyang 16 puntos, samtang si Amber Cajes napugngan lang ngadto sa otso puntos.

Sa laing bahin, sila si Ivor Bregente ug Yo Nueneran miposa’g 13 ug 10 puntos aron pangulohan ang Duty Free-Mactan nga maoy midiktar sa tibuok duwa.

Ang naparot nga Duty Free-SM gipangulohan sab ni Alejandro Villaluz, kinsa miarangkada’g 14 puntos.

Ang torneyo matapos karong Martes gipadagan nilang Ogie Cenabre ug Gani Tajo inabagan nilang Eduard Escorial, Norman Tisoy ug Roland Yamelo. (BANAT PALARO)