Nakabawos
CEBU, Philippines – Usa ka maanindot nga gasa ang gihatag sa University of the Visayas Green Lancers ngadto sa ilang school president nga si former Cebu 1st District Representative ug kanhi Talisay City Mayor Eduardo R. Gullas, kinsa nagsaulog sa iyang adlaw'ng natawhan kagahapon dihang mikulit sila og 70-63 nga kadaugan batok sa University of San Carlos Warriors sa Game-2 sa ‘best-of-five’ championships series sa 15th Cebu Schools Athletic Foundation, Inc. (CESAFI) basketball tournament kagabii didto sa Cebu Coliseum.
Ilogan sa Lancers ug Warriors ang 2-1 nga liderato ugma sa alas-6 sa gabii sa Game-3 diin ang modaog maglawig na sa kampiyonato.
Agresibo nga matang sa opensa ang gipakita sa Lancers gikan gyud sa sinugdanan sa duwa
Nagisian sa iyang suwang ang point guard sa Lancers nga si June Kent Manzo sa katapusang uno minuto sa fourth period dihang misugat siya sa nag-lay up ni Shooster Olago. Apan bisan pa niana, siya gihapon maoy nahimong best player of the game human moiskor og 20 puntos diin aduna siya’g 7 of 15 sa field goal.
Ang Lancers, milabaw og 21 puntos, 51-30 human sa basket ni Alfred Codilla nga maoy labing daku nga biya sa kasamtangan nga series.
Bisan pa’g mibahog og 26 puntos si Olago ingon man sa iyang 14 ka rebounds ug duha ka assists, wala gihapon sa average ang ilang duwa tungod kay wala makatabang og maayo silang Nico Magat, Ian Ortega, Charles Pepito ug Victor Rabat.
Si Ian Tagapan mihimo’g 17 puntos, apan didto na kini sa second half ang uban niyang mga puntos. Igo lang silang mihimo’g ubos sa 30 percent field goal shooting nga maoy hinungdan nga milabaw og daku ang Lancers aron makatabla sa series sa 1-1.
Silang Francisco Arong ug Arvie Cabanero pareho sab mihimo’g double figures alang sa Lancers sa ilang 11 ug 10 puntos.
Puntos matag usa
UV (70) – Manzo 20, Arong 11, Cabanero 10, Akomo 9, Suerte 6, Codilla 6, Mendoza 4, Aguirre 2, Segumpan 2.
USC (63) – Olago 26. Tagapan 17, Laguyo 5, Rabat 5, Suarez 3, Ortega 3, Pepito 3, McAloney 2. (BANAT NEWS)
- Latest
