Tillor, Sorongon nag-una sa 39th Milo Marathon

CEBU, Philippines – Mihimo og back-to-back nga kampiyonato si Noel Tillor, samtang mipatigbabaw ang kapaspas ni Ruffa Sorongon aron dominaran ang Cebu leg sa 39th National Milo Marathon kagahapon sa buntag didto sa Cebu City Sports Center.

Ang 30-anyos nga si Tillor mipamatuod nga siya karon ang kasamtangang hari sa Cebu running scene dihang gitapos niya ang 21 kilometros nga lumba sud sa usa ka oras, 14 minutos ug 46 segundos.

Miingon si Tillor nga human niya maangkon ang qualifying round, sunod niyang pangandaman ang mas dakung hagit sa 42K National Finals didto sa Angeles City sa hinapos nga bahin ning tuiga.

“Lig-on pud ang mga kontra kay nag-ensayo pud sila pero kompiyansa nako daan nga makuha nako ang title,” matud pa ni Tillor.

Nagsunod kaniya mao sila si Narceso Deterala (1:16:36) ug Adonis Singson (1:17:29) sa ikaduha ug ikatulong dapit.

Sa iyang bahin, ang lumad nga taga-Sultan Kudarat nga si Sorongon nakasugat og lisud nga kompetisyon batok ni Miscelle Gilbuena, apan bisan pa niini nakuha gihapon niya ang unang dapit.

Si Sorongon mitala og oras nga 1:29:05, gisundan ni Gilbuena nga adunay 1:32:04, samtang si Lizane Abella maoy third placer sa oras nga 1:42:58.

Sila si Tillor, Sorongon ug Gilbuena maoy makadawat sa all expense-paid trip ngadto sa Angeles City alang sa National Finals human usab sa ilang impresibong finish time.

Sa 10K division, sila si Prince Joey Lee ug Geneda Arcuino maoy midaog sa ilang oras nga 33:22 ug 42:35.

Si Lee gisundan nila ni Franie Canumay (33:52) ug Riez Enriquez (37:01), samtang mikompleto sa top three finishers sa women’s class uban ni Arcunio mao sila si Lovely Fe Andrin (44:05) ug Melody Perez (48:03).

Way nakaapas nila ni John Cliff Debulosan (16:14) ug Maryjoy Loberanis (18:58) sa 5K division, samtang sila si Joseph Antiola (11:34) ug Jessel Ochia (12:00) maoy miangkon sa titulo sa 3K category. (BANAT NEWS)