Marcial Abante sa quarterfinals sa World Boxing Championships
CEBU, Philippines – Ang pambato sa Pilipinas nga si Eumir Felix Marcial mipilde sa inilog niining kontra nga si Youba Sissokho sa Spain pinaagi sa ‘split decision’ aron pag-angkon og luna sa quarterfinals sa AIBA World Boxing Championships didto sa Ali Bin Hamad Al Attiya Stadium sa Doha, Qatar.
Ang duha ka judges gikan sa Russia ug Turkey miiskor og 29-28 pabor sa 19-anyos nga si Marcial, samtang ang Uzbek judge mitali og susamang iskor alang ni Sissokho hinungdan sa split decision.
“Puro kombinasyon ang binato ko at malalakas ang patama ko, akala ko nga nakuha ko lahat ng round. Pero okay lang, ang importante nanalo tayo at buhay ang pangarap natin na maka-Olympics,” matud pa sa Zamboangeño.
Samtang ning pagsulat, gisugdan na ang quarterfinals diin si Marcial magtinguha nga makabawos batok ni world No.1 Daniyar Yeleussinov sa Kazakhstan nga mipilde kaniya sa finals sa Asian Championships didto sa Bangkok, Thailand sa miaging bulan. Samtang si Rey Ladon makigtakos batok ni Dawid Jagodzinski sa Poland diin ang modaog segurado na sa bronze medal.
Ang duha ka Pinoy’ng boksidor kinahanglan nga modaog sa sunod nilang duha ka mga duwa aron makaangkon og luna sa Rio de Janeiro Olympics sunod tuig. (BANAT NEWS)
- Latest