Nietes milupad na paingon sa Amerika
CEBU, Philippines - Milupad na kagahapon paingon sa Los Angeles si two-division world champion Donnie ‘Ahas’ Nietes alang sa makasaysayanon niyang away didto sa Amerika.
Nalangan ang pagbiyahe ni Nietes gumikan kay niadto man lamang Martes siya naisyuhan og US visa. Pila na ka higayon nga nakataak si Nietes sa Amerika, apan nanginahanglan siya og espesyal nga visa gumikan kay away man maoy iyang tuyo pag-adto sa maong dapit ning higayona.
Uban sa iyang trainer nga si Edmund Villamor, si Nietes makigduyog gilayon sa iyang stablemates sama sa managsuong ‘Prince’ Albert ug Jason ‘El Niño’ Pagara ug si Mark ‘Magnifico’ Magsayo didto sa Wild Card Gym sa Los Angeles nga gipanag-iya sa notadong trainer nga si Freddie Roach.
Si Nietes (36-1-4, 21KOs) gikatakda nga modepensa sa iyang WBO light flyweight title batok sa Mexican challenger nga si Juan ‘Pinky’ Alejo (21-3-0, 13KOs) sa main event sa labing unang Pinoy Pride event didto sa Amerika karong Oktubre 17 didto sa StubHub Center sa Carson City, California.
Didto sa L.A., si Nietes makig-sparring batok ni Brian Viloria, kinsa kasamtangan sab nga nangandam sa umaabot niyang away batok sa bag-ohay pang gikoronahang pound-for-pound king nga si Roman Gonzalez sa Nicaragua sa susamang petsa didto sa Madison Square Garden sa New York.
Matud pa ni Nietes nga naghinam-hinam na siya sa iyang U.S. debut ug iyang buhaton tanan kutob sa iyang makaya aron makaayag og maayong away ug ingon man moguwa nga malampuson. (BANAT NEWS)
- Latest
