Boxing card sa Pardo Septiyembre 20
CEBU, Philippines – Dunay promotion nga ipahigayon didto sa Sitio Exoville sa Basak, Pardo sunod Domingo, Septiyembre 20 diiin dunay siyam ka paresan--lakip niini ang amateur ug professional bouts ang molingaw sa mga Pardohanon atol sa ilang pagsaulog sa tinuyo nga kapistahan nga ipahinungod sa ilang patron nga si Sto. Tomas de Villanueva.
Ang promoter sa maong boxing card mao si Nigel Stefan Lopez ug ang major sponsors mao silang Naris Singwancha ug instructor Sensidong Komjokai.
Unang magsangka silang John Kevin Jimenez sa Mambaling Elementary School batok kang Lester Balabat sa Oppra Elementary School. Si Jimenez, manghud ni Junriel ubos sa Chao Sy Stable.
Laing magsangka sa amateur bout mao silang Rodmar Umpas sa Abellana National School batok kang Eduard Jimenez nga gikan gihapon sa Abellana ug sundan kini sa sangka tali nilang Jeffrey Jimenez sa Mambaling National High School batok kang Adrian Rosal sa Abellana.
Ang kataposang amateur bout mao ang sangka tali nilang Harold Arawan sa Basak National High School batok kang Robbie Roble sa Labangon.
Unang magsangka sa professional category mao silang Kid Villacrusis ang Batang Carbon batok kang Bad Boy Magos gikan sa Rex Wakee Salud Stable.
Magsangka sab silang Gilbert Magos gikan gihapon sa Rex Wakee Salud Stable ug si Rommel Cortes gikan sa Cortes Stable.
Si Paulo Cortes gikan sa Danao Elementary School makigsangka batok kang Kover Jhon Cortes gikan sa Exoville, Pardo samtang si Macmac Cortes gikan gihapon sa Danao, makigsangka batok kang Junior Arawan sa Exoville.
Sa kataposang sangka, maoy magtakos silang Frances Cortes sa Danao batok kang Don Josh Cortes gikan sa Martires.
Ang ubang mga sponsors sa maong boxing card mao ang Big Yellow Boxing Club ug ang LaGloria Residence Inn diha sa dan Climaco, ning dakbayan dili layo sa Cebu Coliseum. (BANAT NEWS)
- Latest
