‘Shaolin’ DAOG bronze medal sa World Cup
MANILA, Philippines - Dungog ang gihatod sa 11-anyos nga si Ken ‘Shaolin’ Caniga alang sa nasud human siya midaog og bronze medal sa prestihiyosong International Federation of Muay Thai Amateur-Royal World Cup didto sa Bangkok Thailand.
Ang Cebuano kickboxing prospect nahimong labing unang Sugbuanon nga midaog sa Royal World Cup nga gisalmotan sa mga banggiitang national team members gikan sa 127 ka nasud.
“The competition was really tough and the participants were the elite of the elites coming from their own national teams but Ken really showed skills and courage during the whole competition,” matud pa sa head coach ug uyoan ni Caniga nga si Master Benigno ‘Ekin’ Caniga Jr. atol sa press conference sa miaging gabii didto sa Yaw-Yan ArDigma headquarters diha sa Sanciangko street, ning siyudad.
Human midaog sa preliminary round, si Caniga miabante sa quarterfinals sa junior cadet (30 kgs.) division diin giangkon niya ang bronze medal pinaagi sa pagkulata sa mas dakung Italian fighter nga si Dascanio Stanislav pinaagi sa unanimous decision.
Si Caniga pakyas pagsulod sa gold medal round human mapilde sa sikit nga ‘split decision’ batok sa Thai nga si Kanunon Thanapon.
“Ngilngig gyud to ang Thai fighter ug mas experienced kay naka-50 fights na man, pero nahatagan siya og lisud nga away ni Ken,” dugang pa ni Master Ekin.
“Kulbaan ko pero wa ko mahadlok. Daghan ko og nakat-onan sa ka to nga away ug mas ganahan ko mag-training na og maayo,” matud pa ni Ken, kinsa usa usab ka two-time national champion sa Batang Pinoy.
Si Ken mobalik na og training uban sa national team diin sunod niyang pangandaman mao ang IFMA World Championship sa Mayo 19 sunod tuig didto sa Sweden. (BANAT NEWS)
- Latest
