Dragons mingmakmak sa Boomerangs sa E-League
CEBU, Philippines – Ang Supportsave Dragons mipatukay-ang sa Telstra-Teletech Boomerangs, 100-86, sa gubat tali sa duha ka inilog nga mga koponan ubos sa Evo League sa nagpadayong aksiyon sa 11th CSCC E-League men's basketball tournament niadtong Sabado diha sa City Sports Club-Cebu gym.
Si Niño Belande mitapos og 21 puntos uban ang 12 ka rebounds ug walo ka assists alang sa Dragons nga maoy midominar sa duwa gikan sa pagsugod. Ilang gitak-op sa first half sa iskor nga 46-40 ug dayon miratsada na sab sa ikatulong kuwarter, 27-21, aron pag-inat sa ilang bintaha ngadto na sa usa ka dosenang puntos, 73-61.
Naka-angkon og igong suporta si Belande gikan ni Germaine Jo Guarisma, nga miposa sab og 21 puntos uban ang lima ka assists ug upat ka rebounds. Si Gerald Mari Baritua mi-amot og 14 puntos.
Si Sam Jordan Hermosa mipatuasik og 41 puntos ug 18 ka rebounds apan nakawang lamang ang iyang paningkamot sa habig sa Telstra.
Sa laing duwelo sa Evo League, si Jade Seno mikimada og 21 puntos ug siyam ka assists, samtang si Charles Andrew Ybañez mitipig og 18 puntos uban ang unom ka rebounds aron pagtuboy sa The Result Spartans ngadto sa 101-72 nga pagmasaker sa 1&1 Marauders.
Si Winston Pacaldo dunay 17 puntos ug 11 ka rebouds, samtang si Kevin Gialogo mihipos og 12 puntos ug siyam ka rebounds alang sa Spartans, nga wala na molingi pa human mi-abante sa unang kuwarter, 24-17. Padayon niining gibayo ang ilang kontra matag kuwarter dayon na ngadto sa pagposte og 29 puntos nga kalampusan.
Sa Elite Classic, si Franz Martinez mipabuto og 22 puntos ug 14 ka rebounds aron pag-aswat sa Wipro Tigers batok sa ePerformax Reds, 80-77, samtang si Franz Dione Dysam mitali og 17 puntos, walo ka steals, upat ka assists ug upat ka rebounds aron pagpangu sa 66-49 nga paglampurnas sa Convergys Converters sa nagkagidlay nilang sister-team nga Convergys Blue Devils. — EBV(BANAT NEWS)
- Latest
