Wala magsilbe

CEBU, Philippines - Hangtod nga wa’a pay maatbang ang Gilas Pilipinas ngadto sa higanteng si Hamed Haddadi  sa Iran dili gihapon kini magsilbe ug magpabilin   maglisud.

 Napamatud-an kini kagahapon dihang gipukan na usab sa Iran ang Gilas, 74-65 sa 37th William Jones Cup didto sa Xinzhuang Gym sa New Taipei City, Taiwan.

Ang Gilas katapusan nga midaog sa Iran  niadto pang tuig 2012 sa iskor nga 77-75, apan sukad didto wala na mapilde sa mga Pinoy ang koponan ni Haddadi.

Ang 7-foot-2 nga si Haddadi yanong midaro sa depensa sa bigmen sa Gilas sama nila ni Asi Taulava, Ranidel De Ocampo ug Moala Tautuaa aron moiskor og 22 puntos uban sa iyang 14 ka rebounds.

Sa maong kadaugan, ang Iran mao na karon ang nag-una sa standing sa ilang 5-1 nga baraha, samtang ang Gilas nakatilaw sa ikaduha nilang pilde sud sa lima ka duwa.

Ang Iran giisip nga usa sa mga labing lig-ong pangandaman sa Gilas sa 2015 FIBA Asia Championship karong Septiyembre 23 didto sa China.

Gibiyaan ang Gilas og tres puntos sa halftime, 31-34, apan tungod sa ilang  kagagmay dali kining giinat sa Iran sa hinapos nga bahin sa third period, 54-43  sa mga ataki  nilang  Haddadi ug Mehdi Kamrani.

Nanulod ang tres sa Gilas hinungdan nga nakan-an ang labaw sa Iran sa final period, 61-65, apan wala sila makasustinir  ug gipauwanan sila og mga puntos  lakip na ang dunk ni Haddadi alang sa ilang 70-61 nga bentaha.

Ang Gilas nga gipangulohan ni Asi Taulava nga adunay 12 puntos makigsangka  karon batok sa New Zealand. (BANAT PALARO)