Champion athletes misalida sa UV Intrams 2015
CEBU, Philippines - Mikinang og maayo ang bitoon sa upat ka mga atleta sa University of the Visayas nga sila Kevin Jake Cataraja, Christian Bacolod, Marc Norman Enriquez ug Gwen Jade Ponteros gumikan kay sila man maoy nagsilbeng ‘torch bearers’ atol sa pormal nga seremonyas sa pagbukas sa UV Intramurals 2015 kagahapon didto sa Teresita Square sa maong tunghaan.
Sila si Cataraja ug Bacolod, kansang mga abilidad gihashas sa ALA Boxing Gym, kabahin sa Team Central Visayas nga milangkat sa kampiyonato sa boxing event sa Private Schools Athletic Association (PRISAA) National Games niadtong Abril didto sa dakbayan sa Iloilo. Ang impresibong inawayan ni Cataraja maoy nagtuboy kaniya aron sakmiton ang 'Best Boxer' award.
Si Enriquez kanunay sab nga mohakot og bulawang medalya sa mga torneyo nga iyang salmotan. Si Enriquez ug ang iyang manghod nga si Norman Joseph mikulit og kasaysayan isip labing unang managsuon nga midominar sa tagsa-tagsa nila ka mga kategoriya sa susamang higayon sa tennis singles event sa 2014 Cebu Schools Athletic Foundation, Inc. (CESAFI).
Sa iyang bahin, si Ponteros mikabkab og bulawang medalya sa women’s individual kumite (below 50 kgs. category) sa karatedo event sa PRISAA National Games sa miaging tuig.
Ang University of the Visayas Green Lancers nga gipangulohan ni coach Gary Cortes mitambong sab sa maong mabulokon nga kalihukan nga gisugdan pinaagi sa usa ka zumba session sa alas-7 sa buntag.
Gawas sa indigay sa Mr. ug Ms. Intramurals, lain pang nagdugang sa kasadya sa seremonyas mao ang ‘cheerdance with cheers and yells competition’ nga gidaog sa College of Education.
Ang tanang mga duwa banatan karong adlawa, diin ang College of Business Administration nagpanikad na nga modepensa sa ilang korona. Ang mga events nga kumbatihan mao ang basketball, darts, volleyball, sepak takraw, badminton, swimming, lawn tennis, karatedo, taekwondo, table tennis, scrabble, chess ug dancesport. May pipila sab ka mga ‘Pinoy Games’ nga duwaon sa maong upat ka adlaw nga aksiyon nga matapos karong Sabado. (BANAT NEWS)
- Latest
