Fajardo: "sabta lang ko ninyo"

CEBU, Philippines – Pagsugod pa lang sa PBA All-Filipino Cup, daan nang may gipamati si June Mar Fajardo ug niadtong tungora, wala pa niya damha nga mahimong back-to-back MVP.

Mao kini ang tinuoray nga hinungdan nganong wala moduwa ang 26 anyos nga si Fajardo kinsa padayon nga nagpa-alim karon pinaagi sa paggahin og taas nga pahuway ug therapy sa iyang injury nga plantar facitis.

Atol sa usa ka Thanksgiving Party nga gipahigayon alang kang Fajardo sa iyang pagkapili nga MVP sa ikaduhang sunod-sunod nga higayon, siya mi-ingon nga ganahan unta siyang moduwa sa Gilas apan "unfair" kung moduwa siya nga dili niya ikahatag ang 100 por siyento nga lihok tungod sa injury ug unfair sab ngadto sa iyang mother team ang San Miguel Beermen kay kung mograbe ang iyang injury, dili man ang Gilas maoy mogasto sa pagpatambal.

Bisan gani ang team manager sa San Miguel Beermen nga si Robert Non nagkanayon nga wala nila pugngi nga moduwa ang ilang mga player apan naa ra kanila og moduwa ba sila o dili.

Didto ipahigayon ang press conference sa panimalay ni Arsenio Estenzo, manghud ni Atty. Baldomero C. Estenzo, ang team manager sa University of Cebu diin nagduwa si Fajardo sa iyang collegiate prime ug maoy iyang legal adviser si Atty. Estenzo.

Mihangyo si Fajardo sa pagsabot sa mga fans sa Gilas ilabi na kadtong mga supporters sa San Miguel Beermen tungod kay karong mga panahona, kinahanglan gyud niyang mopahuway aron andam na siya moduwa sa pagbukas sa PBA unya sa Oktubre.

Si Beermen coach Leo Austria daan na sab nakasabot nga daw may gipamati si Fajardo kay nausab og gamay ang iyang linihokan ug mihinay ang iyang dagan. Midapig si Austria kang Fajardo tungod kay bisan og aduna kini injury, wala niya ipakita nga siya gisakitan nga usa ka dalaygon nga birtud sa usa ka player.

Iyang mensahe ngadto sa Gilas nga "God Bless" ug iyang mensahe sa iyang mga fans isip back-to-back MVP mao ang pagpasalamat kanila ug sa iyang mga teammates. Gusto sad niya nga sa dili pa magsugod ang PBA, himsug sab ang tanang teammates sa San Miguel Beer.

Si Fajardo sab maoy mibukas sa ACE Marketing Inter-Color basketball tournament didto sa Soccuoro Estenzo compound diin siya maoy guest speaker ug siya maoy mihimo sa ceremonial toss.

Kauban ni Fajardo sa maong "thanksgiving party" mao ang iyang ginikanan nga silang Bonifacio Fajardo, Jr. ug Marites Fajardo ingon man ang iyang hinigugma nga si Aerielle Patnugon nga kanhi usa ka volleyball player sa Ateneo de Manila University Lady Eagles. (BANAT NEWS)