Junior Webmasters nakaipsot sa Baby Lancers
CEBU, Philippines – Miposa sila si John Bryl Cuyos ug Froilan Mangubat og krusyal kaayong three-pointer sa uwahing bahin sa fourth quarter aron baswaton ang University of Cebu Junior Webmasters ngadto sa 70-64 nga kadaugan batok sa University of the Visayas Baby Lancers sa 15th season sa Cebu Schools Athletic Foundation, Inc. (CESAFI) kagahapon didto sa Cebu Coliseum.
Sila si Cuyos ug Mangubat mao sab ang nangu sa opensa sa Junior Webmasters pinaagi sa ilang 21 ug 20 puntos matag. Si Luigi Konrad Gabisan daku sab og natabang sa kadaugan nga miamot og 15 puntos.
Nawagtang ang dakung labaw sa Junior Webmasters sa second quarter nga miabot ngadto sa 15 puntos, 28-13 human sa three-pointers nilang Cuyos ug Mangubat, apan nagpauwan og puntos silang Raul ‘Jancork’ Cabahug, Beirn Anthony Laurente ug Froilan Magsalang aron mahiyos ang labaw ngadto na lang sa 22-28 sa halftime.
Nakahimo pa gyud paglabaw ang Baby Lancers, 54-49 human sa three-pointer ni Laurente pagsugod sa fourth period. Apan sila si Cuyos ug Mangubat nagpatuasik og mga puntos aron ilogon ang labaw, 64-60.
Si Mangubat maoy nagselyado sa kadaugan sa 3-2 nga Junior Webmasters human sa iyang duha ka free throws. Gipangulohan ni Cabahug ang Baby Lancers pinaagi sa iyang 27 puntos, samtang si Laurente miamot og 17 puntos lakip ang upat ka triples.
Puntos matag usa
UC (70) – Cuyos 21, Mangubat 20, Gabisan 15, Umpad 5, Soco 5, Abejo 3, Hemida 1.
UV (64) – Cabahug 27, Laurente 17, Maglasang 9, Ro. Alforque 5, Membrano 3, Ra. Alforque 2. (BANAT NEWS)
- Latest
