Laing babayeng atleta mipilde sa mga lalaki nilang kontra

CEBU, Philippines – Human sa seklistang si Ana Patricia ‘Ica’ Maximo, lain na sab nga babayeng atleta ang nanghawod sa usa ka torneyo taliwala sa lig-on nga mga lalaking kontra.

Si Jesse Balbona, usa ka CPA kon Certified Public Accountant, mipukan sa mga lalaki niining kaatbang aron pagdominar sa Group B sa August edition sa binulan nga torneyo sa Cebu Executives and Professionals Chess Association (CEPCA) niadtong Domingo didto sa Handuraw Pizza sa Gorordo Avenue, dakbayan sa Sugbo.

Usa ka adlaw sa wala pa misidlak si Balbona, si Ica Maximo mipakurat sa mga lalaki niyang karibal human siya mitapos sa ikaduhang dapit sa makutas nga men’s road cycling race, ang 47-kilometer Bike for Hope Challenge gikan sa Liloan padung sa Barangay Lugo lungsod sa Borbon amihanang bahin sa Sugbo.

Makahuloganon gyud ang maong kadaugan ni Balbona gumikan kay ang labing uwahing torneyo sa CEPCA gipaluyohan man ni Susan Itaas, ang labing una ug nag-inusara pa lamang nga Cebuana National Master sa chess nga tua na karon magbasi sa New York.  Si Balbona nga usa ka bag-ong miyembro sa CEPCA, maoy gikoronahang hara sa Group B nga gisalmotan og 39 ka mga entrante. Iyang gitapos ang kompetisyon bitbit ang labing taas nga 5.5 puntos. Apil sa iyang gipangbihag mao sila si Jun Kidlat, Jonas Bajo ug Manny Abucay nga pulos mga mat-an sa duwang ahedres.

Sila si Elmer Odango ug Michael Tinga maoy mipahiluna sa ikaduha ug ikatulong dapit human mitali og 5.0 puntos.

Sa Group A, si Sgt. Amado Olea, usa ka sundalo sa Philippine Air Force nga anaa magbasi sa  Mactan, maoy nanghawod sa nakulit niining 4.0 puntos. Napilde siya sa una niyang duwa batok ni Yves Christian Fiel, apan giharos niya og pilde silang Jojo Muralla, Carlo Maraat, Tony Cabibil ug Rosendo Yamyamin.

Gawas nga mibulsa sa ganting salapi, sila si Olea ug Balbona nakaangkon sab og luna sa grand finals nga nailhan sab nga  ‘CEPCA Battle of Champions’ karong Disyembre. (BANAT NEWS)