Don Gerardo spikers mipakaging sa University of Cebu

CEBU, Philippines - Gisugdan sa Don Gerardo Llamera Ouano Memorial National High School ang ilang kampanya pinaagi sa pagpakaging sa mas tag-as nga University of Cebu sud sa duha ka sets pagsugod sa Central Visayas leg sa Shakey’s Girls Volleyball League Season 13 kagahapon didto sa Cebu City Sports Institute (CCSI) gym sa Brgy. San Nicholas.

Human midaog sa unang set, 25-14, ang Don Gerardo spikers nakasustinir sa ilang kainit aron  pagpakgang sa UC sa susamang iskor. Ang Don Gerardo nagtinguha nga mokulit og laing daog sa dihang ilang sangkaon ang Paref Southcrest School karong alas-4 sa hapon.

Nagduwa sila ubos sa pool A uban sa defending champion University of San Carlos, St.Theresa’s College ug Pajo National High School sa Lapu-Lapu City.

Magkumbati sa pool B mao ang University of San Jose-Recoletos, Southwestern University-Phinma Education, Sacred Heart School-Ateneo de Cebu and Hijas de Jesus ug University of Southern Philippines Foundation.

Magduwa sila ubos sa single round robin format sa eliminasyon diin ang top two teams matag bracket moabante sa crossover semifinals. Ang mga mananaog magtige dayon sa kampiyonato.

Gawas nga morepresentar sa rehiyon sa Shakey’s GVL League of Champions karong Nobiyembre didto sa Biñan, Laguna, ang mokampiyon moduwa sab og usa ka international tournament batok sa lig-ong mga koponan gikan sa South Korea, Thailand, Canada, Japan ug Australia. (BANAT PALARO)