UV batok USJ-R
CEBU, Philippines - Solong liderato maoy puntariya sa University of the Visayas Green Lancers ug University of San Jose- Recoletos Jaguars sa dihang magtigi sila karong adlawa sa 15th Cebu Schools Athletic Foundation, Inc. (CESAFI) men’s basketball tournament diha sa Cebu Coliseum.
Samtang ang Lancers midaog pinaagi sa forfeiture batok sa Cebu Institute of Technology-University Wildcats human gikanselar ni CESAFI commissioner Felix ‘Boy’ Tiukinhoy Jr. ang duwa sa CIT sa college ug high divisions, tungod sa pagkapakyas og sumiter sa gikatakdang deadline niadtong Domingo sa ECG medical certificates sa ilang mga players, ang Jaguars kinahanglan pang magpatulo og singot sa wala pa nila maangkon ang daog batok sa University of Cebu Webmasters, 85-68.
Sa pagbalik ni Nigerian cager Steve Cedrick Akomo, ang Lancers maoy paborito nga modaog batok sa Jaguars, kinsa moduwa nga walay import.
Gubat sab kini tali sa veteran coach Jun Noel sa USJ-R ug rookie Gary Cortes sa UV.
Gawas ni Akomo, ang rookie coach sa UV nga si Gary Cortes magsalig sab sa iyang mga lokal pangulohan ni Franz Arong, Alfred Codilla, Leonard Santillan, Josue Segumpan, Rey Anthony Suerte, Arvie Cabañero ug June Kent Manzo III.
Sa iyang bahin, si Noel gilauman nga moparada sa iyang mga kasaligang batos nga sila si Mark Labares, Kevin Villafranca, Ralph Dinolan, Edmundo Bayhonan ug rookie Ricky Dyn Peromingan.
Sa laing bahin, ang University of Southern Philippines Baby Panthers ug ang Cebu Eastern College Dragons laraw nga moiskor sa ilang unang daog dihang magsangka sila sa juniors division nga gikatakda sa alas-5:30 sa hapon. (BANAT NEWS)
- Latest
