SGM Cacoy mag-96 anyos na

Kun ikaw ang mag-edad og 96-anyos, dili tingali nga kakapoy ang imong bation. Apan lahi kini si eskrima Supreme Grand Master Ciriaco ‘Cacoy’ Cañete kay gusto pa gihapon siyang mopahigayon og practice bisan og kanunay na siyang mag-wheelchair.

Halos sa tibuok niyang kinabuhi, maoy gihimo ni GM Cacoy ang pagsangyaw sa Filipino martial arts nga eskrima kon ‘arnis’ ilabi na sa iyang mga igsuon pinaagi sa pagpangulo sa ilang kamaguwangan, ang  founder sa Doce Pares Eskrima Club niadtong 1932.

Si GM Cacoy maoy hinungdan nganong miabot og kaliboan ka mga sakop sa Doce Pares ang nahimutang karon sa lain-laing dapit sa kalibotan tungod kay dili pa lang siya dugay mihunong sa pagbisita sa Estados Unidos, Europe ug Australia aron motudlo og eskrima ngadto sa mga langyaw.

Mahibung tingali kamo nga adunay mga langyaw nga usahay magsuroy-suroy sa atong kadalanan nga magsul-ob og itom o pula nga t-shirt nga adunay markang “Cacoy Doce Pares” tungod kay kanang mga tawhana mga  tinun-an kana ni GM Cacoy.

Magbalik-balik sila dinhi sa Sugbo kay gusto pa gyud nga madugangan ang ilang nakat-onan sa eskrima nga maoy ilang self-defense ginamit ang olosi kon ‘rattan stick’ nga dili na magkinahanglan pa og punyal (kutsilyo) o armas de fuego o firearm sama sa revolver ug pistola aron depensaan ang kaugalingon kun dunay magbinuang.

Tungod sa ilang dakung pagtahod kang GM Cacoy, ang mga langyaw maoy mobisita dinhi sa Sugbo aron lang moensayo sa Cacoy Doce Pares Club headquarters diha sa dan C. Padilla, ning dakbayan.

Ang apo ni SGM Cacoy nga si GM Chuck Cañete, nagkanayon nga dunay usa ka grupo sa mga Filipino Martial Arts Heritage gikan sa Amerika pinangulohan ni GM Victor Gendrano  Jr. nga mopahigayon og workshop karong semanaha hangtod na ngadto sa Agosto 8 nga maoy adlaw’ng natawhan ni SGM Cacoy.

* * *

Mitiyabaw. Daghang mga ginikanan sa players nga moduwa sa Sacred Heart School-Ateneo de Cebu  sama ni Josh Sinclair nga sayong mitungtong sa high school silotan man hinuon. Unya kadtong pwerteng dugaya nangitlog sa elementarya mao man hinuon makaduwa bisan og medyo guwang na.

Tungod tingali sa ka-bright aning Sinclair, posibleng sayo kaayo siya nag-high school, apan bisan kwalipikado pa unta siya sa iyang edad, dili na siya makaduwa karon sa CESAFI high school division. Usa ka ginikanan sa SHS-AdC Magis Eagles ang makigpustaanay nga dunay pareho og edad karon ni Sinclair apan moduwa pa sa CESAFI. Matud pa niya dili unta ang edad maoy basihan kun dili ang iyang playing years. Ila kanang opinyon ug lahi sab ang panahom sa CESAFI busa ato kining respetohan.