3-0 sweep tuyo sa University of the Visayas

CEBU, Philippines - Suwayan sa wala’y pildeng University of the Visayas Green Lancers mo-sweep sa elimination games aron moabante sa finals sa dihang ilang sangkaon ang University of San Jose-Recoletos Jaguars sa Bogo City Mayor’s Cup   basketball tournament karong gabii didto sa Celestino E. Martinez Jr. Sports Complex, Bogo City. Ang engkwentro sa Lancers  ug Jaguars  sugdan sa alas-6  sa gabii, sundan sa duwa  sa University of San Carlos Warriors ug University of Cebu Webmasters sa alas-7:30. Ang modaog tali sa Lancers ug  Jaguars posibleng  moharong sa Warriors sa knockout finals nga maoy mas paborito batok sa Webmasters.

Sa tuyo nga mo-sweep, ang 3-0 nga Lancers mosulong sa Bogo dala ang  tibuok  puwersa lakip ang ilang import nga si Steve Cedrick Akomo ug posible sab si head coach Gary Cortes maoy modala sa renda.

Sa  miagi nilang tulo ka daog, ang assistant coach  nga si Junel Maglasang maoy midala sa Lancers, kinsa miiskor og dakung upset  batok sa Warriors bisan pa’g  kulang sila niadtong tungora ug wala'y import.

Si Rey Suerte maoy usa sa labing dakung factor ug maoy consistent scorer alang sa  Lancers.

Ang Jaguars magsalig   karon sa ilang opensa uban sa ilang bigman nga si Kevin Villafranca, uban nilang Ralph Dinolan, Mark Labares, Iron Suano ug mga rookies nga silang Ferdinand Resma ug Jaybie Mantilla.

Sa laing bahin, ang  Warriors nga nagtabla uban sa Jaguars sa ilang 2-1 records magsalig  sa ilang import nga si Shooster Olago  ug bigmen nga sila si Charles Pepito ug William McAloney. Motabang sab ang ilang shooters nga silang Victor Rabat, Ian Tagapan ug Nico Magat.  Ang 1-2  nga Webmasters mosalig  nilang Melvin Botuhan, Earl Montilla, Justin Dacalos ug  Graciano Puerto. (BANAT NEWS)