Gullas ngadto sa mga atleta: hatagig’ importansiya ang edukasyon

CEBU, Philippines - Ang Sugbuanong pilantropo nga si Jose ‘Dodong’ R. Gullas mipaambit sa impor-tansiya sa edukasyon ngadto sa mga atleta uban sa pagdasig kanila nga magpabilin nga mapahiubsanon bisan og unsa pa man ang nakab-ot sa ilang kinabuhi.

Sa iyang mensahe atol sa 33rd Sportswriters Association of Cebu-San Miguel Brewery (SAC-SMB) All-Cebu Sports Awards sa miaging adlaw diha sa Ayala Activity Center, si Gullas unang miawhag  sa  mga  atleta nga  iapil  ang  pag-ampo sa inadlaw nilang kalihukan gumikan kay ang ilang talento ug ang naangkon nilang dungog gasa gikan sa sa Labaw’ng Makagagahum.

Si Gullas mitambong sa maong kalihukan dili lamang pinasidunggang dinapit kay usa man sab siya sa mga special awardee.

Siya maoy midawat sa ‘Presidential Award’ gumikan sa daku niyang natabang ug dedikasyon sa kalamboan sa paugnat sa kusog dinhi sa Sugbo.

Gipahimangnoan ni Gullas ang ubang awardees nga  sa  kanunay ipabilin  ang  ilang  mga tiil sa yuta taliwala sa nag-lagiting nga kalampusan nga ilang natagamtaman.

Gawas niini, gipa-hinumduman sab ni Gullas ang mga atleta sa kamahinungdanon sa edukasyon nga alang kaniya  maoy labing lig-on nilang taytayan ngadto sa maayong kaugmaon.

“Please study very very well. Do not forget your studies, because you will not be athletes in your lifetime. By studying, it will guarantee you a good future. You can be the best athlete there is but what is more vital is education,” pasabot pa ni Gullas.

  “When one’s focus is on sports, he can easily turn his back on drugs and other undesirable vices, making him a worthy member of the society,” dugang pa sa Executive Vice President sa University of the Visayas ug Chairman sa The Freeman, igsuong mantalaan sa Banat News.

  Si Gullas gitunolan sa usa sa labing taas nga pasidungog sa SAC gumikan sa pagporma niini’g JRG Gullas Cup, ang nailhan nga tigbaid og Sugbuanong tennis champions sukad kini mahimugso niadtong tuig 1995. Karon nga anaa na kini sa ika-20 nga tuig, ang JRG Gullas Cup mapasigarbuhon isip maoy labing karaan nga junior tennis tournament gawas sa Metro Manila. (BANAT NEWS)