Dodong Gullas dinapit sa SAC awards

CEBU, Philippines – Ang Sugbuanong philanthropist nga si Jose ‘Dodong’ R. Gullas maoy pinasidunggang dinapit sa 33rd Sportswriters Association of Cebu-San Miguel Brewery (SAC-SMB) All-Cebu Sports Awards karong adlawa diha sa Ayala Activity Center.

Ang tulo ka oras nga programa pagasugdan sa alas-3 sa hapon. Si Gullas, ang Executive Vice President sa University of the Visayas (UV), dili lamang motambong sa maong kalihukan isip motivational speaker, apan isip usa sab ka special awardee. Siya modawat sa “Presidential Award” gumikan sa iyang dedikasyon ug dako nga natabang alang sa kalamboan sa paugnat sa kusog dinhi sa Sugbo.

Si Gullas pasidunggan gumikan sa pagporma niini og JRG Gullas Cup, ang nailhan nga tigbaid og Sugbuanong tennis champions sukad kini mahimugso niadtong tuig 1995. Mao sab kini ang labing unang event nga nakaangkon og Group 2 ranking sa Philippine Tennis Association.

Karon nga anaa na kini sa ika-20 nga tuig, ang JRG Gullas Cup mapasigarbuhon isip maoy labing karaan nga junior tennis tournament gawas sa Metro Manila. Usa sa labing mahinungdanon nga kompetisyon sa kalendaryo sa tennis dinhi sa nasud, mao sab kini ang kanunay’ng giatngan nga torneyo sa mga disipolo sa maong racquet sport sa Kabisay-an ug Mindanao.

Sud sa nanglabay’ng mga katuigan, ang JRG Gullas Cup nakahulma na og pipila ka national champions, lakip na silang Jacob Lagman, Fitzgerald Tabura, Sally Mae Siso, Oswaldo

Dumoran ug  si Francis Casey ‘Niño’ Alcantara, ang 2009 Australian Open junior doubles champion.

Gawas sa tennis, si Gullas mihimo sab og marka isip champion basketball player, coach ug team manager. Siya maoy co-captain ni anhing Eduardo ‘Skipper’ Cabahug sa dihang gipukan sa UV Green Lancers ang NCAA champions Ateneo Blue Eagles, 74-63  aron pagdominar sa 2nd National Inter-Collegiate Basketball Championships didto sa Rizal Memorial Coliseum sa Manila niadtong tuig 1957. Mao kadto ang labing unang duwa nga gikoberan sa telebisyon sa kasaysayan sa Philippine basketball. (BANAT NEWS)