Geobert Merchandise, Gabela gisubha’g daog

CEBU, Philippines -  Gisubhan dayon og daog ang Geobert Merchandise ug ang  Gabela sa una nilang duwa sa 4th  Consolacion Barkadahan Basketball League (CBBL) tournament nga gibuksan niadtong Domingo didto sa Brgy. Pulpogan gym sa Consolacion.

Ang Geobert Merchandise midaog batok  sa Radisson Hotel, 88-81, samtang midaog sab ang Gabela batok sa Jetti Petroleum, 68-58.

Si Cyril Seballana mikamada og 29 puntos aron mangulo sa kadaugan sa  Geobert Merchandise, kinsa nakakuha sab og maayong  suporta gikan nilang Bing  Abrasado ug Harold Javier nga miwitik og 12 ug 10 puntos matag usa.

Human magtabla sa first period, 22-all, ang Geobert Merchandise kalit nga miarangkada aron makapundo  og 17 puntos nga labaw, 55-38 sa hinapos nga bahin sa maong kuwarter, apan inanay kining nahilis  ngadto na lang sa tres puntos, 59-56 dihang mi-rally ang Radisson Hotel sa  panagtambayayong nilang Clifford Maguate, BJ Gonzales ug Joenard Pales.

Dali hinuon nakarekober ang Geobert ug ila gyud naangkon ang daog.

Si Andy Perales maoy nangu sa Radisson Hotel pinaagi sa iyang 22 puntos, gisundan ni Maguate nga adunay 11 puntos.

Sa laing bahin, sila si Joel Pitogo ug Alan Abrasado nagkumboya’g 22 puntos aron pangulohan ang  Gabela, samtang si Adonis Obiña mao sab ang nangu sa Jetti Petroleum nga mibomba og 17 puntos, gisundan nilang Randy Povadora ug Jonathan Manzo nga mitubil og 11 ug 10 puntos matag usa.

Ang mga duwa nga gidumala ni league organizer Eduard Escorial uban ni Kenneth Tagalog gipaluyohan sa Pulpogan Motorparts, Orlmon Video, Erika’s Delight Bakeshop ug Shea’s Delicious Peanut.

Puntos matag usa

Unang duwa:

Geobert Merchandise (88) – Seballana 29, B. Abrasado 12, Javier 10, Paramel 9, Capao 9, A. Abrasado 8, Sajot 5, Sausa 4.

Radisson Hotel (81) – Perales 22, Maguate 11, Pales 9, Larobis 7, Gonzales 7, Santiago 5, Iting 4, Inopia 4, Belano 3.

Ikaduhang duwa:

GABELA (68) – Pitogo 12,  Abrasado 10, Kulayan 8, Braggy 7, Marchin 6, Sanchez 6, Jazz 4, Sasing 4, Healthy 4, Pepino 3, Jabinez 2.

JETTI PETROLEUM (58) – A. Obiña 17, Povadora 11, Manzo 10, J. Obiña 5, Lastimosa 5, Madolid 4, Guiapal 3, Comeros 2. (BANAT NEWS)