Gin Kings kaging sa Painters

CEBU, Philippines – Mirehistro og double-double 18 puntos ug 11 ka rebounds ang star point-guard sa Rain or Shine nga si Paul Lee aron pangulohan ang Rain or Shine Elasto Painters sa usa ka kulbahinam nga 82-79 nga kadaugan batok sa Barangay Ginebra San Miguel kagabii sa PBA Commissioners Cup sa Cuneta Astrodome.

Ang import nga si Wayne Chism maoy leading scorer sa iyang 28 puntos, samtang si Beau Belga kinsa kapila nalambigit sa init nga komprontasyon batok sa  Ginebra players mitapos og 11 puntos.

Sa kasikit sa duwa, wala malikayi sa duha ka koponan nga magkainitay tungod usab sa kapisikal sa duwa. Si Belga diriyot makig-lamok-lamok ni Ginebra star Mark Caguioa ug nagkatinubagay usab sila sa import nga si Michael Dunigan.

Hinuon si Belga ang maisip nga nakabintaha sa maong engkuwentro tungod kay siya ang mihimo og krusyal nga tapal ngadto ni Mac Baracael kinsa miitsa og tres aron ihatud unta ang duwa sa overtime.

Si Dunigan maoy leading scorer sa Gin Kings sa iyang 24 puntos, samtang si Greg Slaughter mihimo og 10 puntos.

Sa maong kadaugan, ang Rain or Shine misaka sa 6-3 win-loss record nga mipahayag sa ilang kahigayunan sa automatic semis berth. Ang naparot nga Ginebra natagak sa 4-5 nga baraha diin maninguha sila nga madaug ang mga nahibiling duwa aron makasud sa playoffs.