CKSC sisimulan ang depensa vs UC-Baguio
MANILA, Philippines - Pangungunahan ng nagdedepensang Chiang Kai Shek College ang 18 finalists sa pagdribol ng 2015 Seaoil-NBTC National High School Championships ngayon sa tatlong magkakaibang venues.
Lalabanan ng CKSC Blue Dragons ang University of Cordilleras (Baguio) sa ganap na alas-9:45 ng umaga sa Philsports Arena sa Pasig bago labanan ang St. John’s Institute (Bacolod) sa alas-2:15 ng hapon sa Ynares Sports Arena.
Magtatapat naman ang Sacred Heart School-Ateneo de Cebu at ang Assumption College (Davao) sa alas-12:30 ng tanghali matapos ang pang alas-11:30 ng umagang inaugural ceremony sa Ynares Sports Arena.
Si Samahang Basketbol ng Pilipinas executive director Sonny Barrios ang magbibigay ng opening remarks, habang si Ateneo Blue Eagle star Keifer Ravena ang magbabahagi ng inspirational message.
Matapos ang parada ng mga koponan ay pamumunuan ni NBTC Mindanao territorial head Arvin Martinez ang invocation at ang Arellano University Drum and Lyre ang tutugtog ng National Anthem.
Makakasama ni Barrios sa ceremonial toss sina National Basketball Training Center program director Eric Altamirano at tournament directors Edmundo Badolato at Manny Nitorreda.
- Latest
