Barako gilat-an sa Rain or Shine

CEBU, Philippines - Gisakmit sa Rain or Shine Elasto Painters  ang  ilang  ikatulong sunod-sunod nga daog human nila paniti ang Barako Bull Energy Cola, 103-91 sa nagpadayong aksiyon sa 2015 PBA Commissioner’s Cup kagabii didto sa  Smart Araneta Coliseum.

Milusad og 17-2 rally ang Rain or Shine sa 7:59 sa first half nga maoy mihatag kanila og 47-29 nga bentaha.

Gikan didto, hingpit nang gikontrolar sa Painters ang momentum sa duwa ubos sa pagpangulo sa ilang import nga si Wayne Chism, kinsa mirehistro og 32 puntos.

Si Paul Lee miiskor usab og 16 puntos,  samtang ang Cebuano bigman nga si J.R Quinahan miamot og 12 puntos alang sa Rain or Shine nga miinat sa ilang rekord ngadto sa lima ka daog batok sa duha ka pilde.

Labing duol nga naabtan sa Barako Bull  mao ang 72-82 nga biya sa katapusang dos minutos sa duwa.

Nangulo sa Energy Cola nga adunay 4-3 nga baraha mao ang import nilang si Solomon Alabi, kinsa mikamada og 23 puntos, samtang si JC Intal mikulit og 17 puntos.