Blackwater nidaog na gyud

CEBU, Philippines - Midaog na gyud ang Blackwater Elite  human  ilang gipakuratan ang All-Filipino Cup champion San Miguel Beermen, 80-77 sa PBA Commissioner’s Cup kagabii didto sa Smart Araneta Coliseum.
Kini ang labing unang daog sa Blackwater sa 15 nila ka duwa sukad  sa ilang pagsalmot sa PBA sa miaging tuig.
Ang San Miguel maoy nidominar sa first half dihang  gipahimuslan nila ang ilang gidak-on batok sa depensa sa Blackwater.
Si Ronald Roberts nanginit sa second period diin milabaw sila og 41-32 sa katapusang tres minutos sa maong kuwarter.
Hinuon, determinado ang Blackwater  nga masakmit nila ang labing una nilang daog sa PBA dihang migukod sila ug gisikit ang duwa.
Ang Cebuano pointguard nga si Bryan Heruela ug import Marcus Douthit nagtambayayong aron mailog ang uno punto nga labaw, 51-50 sa katapusang 5:03 sa third period.
Ang Blackwater misulod sa final period uban ang  dakung paglaum  ug ning higayona, misuporta na sa opensa sila si Bam-Bam Gamalinda ug Alex Nuyles.
Ang footback ni Douthit sa nahibiling 1:28 sa duwa,  maoy nakahayag sa kadaugan sa  Elite diin milabaw sila og singko puntos sa iskor nga 77-72. (BANAT NEWS)