Alit’z team kampiyon sa Sunday.Com cagefest

CEBU, Philippines – Duha ka sunod-sunod nga basket ni Gio Antigua sa himalatyong oras sa fourth quarter maoy nagtuboy sa team Alit’z ngadto sa kadaugan batok sa Bulldog, 62-61 ug ingon man masakmit  ang korona sa  labing unang torneyo sa Sunday.Com Basketball Club niadtong Domingo sa  didto sa Barangay Ibabao-Estancia gym, Mandaue City.

Ang kaisog ug determinasyon maoy gihimong hinagiban sa  Alit’z pagpukan sa Bulldog, kinsa maoy nikontrolar sa duwa gikan sa pagsugod hangtod sa daginutong oras sa final period.

Si Antigua miiskor og 10 puntos, apan si Ritchie Malahos maoy topscorer sa Alit’z  sa iyang 16 puntos.

Naglisud ang Alit’z sa maong duwa, gani gibiyaan sila og 10 puntos, 18-8 sa katapusang uno minuto sa first quarter. Nakan-an ang labaw ngadto  sa dos puntos sa basket ni Atty. Sally Malig-on, 22-24, apan miburot og balik ang labaw ngadto sa nuybe puntos, 39-30  sa tira ni Tawing Grafe sa nahabiling 1:06 sa second period.  Namintinar sa Bulldog ang ilang labaw, apan mikolapso kini sa final period hinungdan nga nailog sa Alit’z ang labaw sa labing unang higayon, 56-55 gikan sa tira ni Neil del Castillo.

Hinuon, nailog pagbalik sa Bulldog ang labaw, 59-58 kortesiya ni Alan Bacus  sa nahabiling 50 segundos, apan si Antigua  mikonektar og “back-to-back” baskets  aron hatagan ang Alit’z og 62-59 nga bentaha sa daginutong oras sa duwa . Ang Bulldog gipangulohan ni Grafe pinaagi sa iyang 12 puntos ug pito ka rebounds.

Sa laing bahin, si Antigua maoy napiling Final MVP, samtang si Diosdado Apa Jr. ang Conference MVP.  Ang Mythical Five naglakip nilang Rene  Grafe, Ritchie  Malahos, Sheldon Gahi, Rufiel Palabay ug Christopher Cabahug.

Ang liga nga gidumala ni Sunday.Com president Tata Nadera  nagmalampuson  tungod sa suporta sa VECO ug IPI, ingon man ni  Engr. Ray Gallego.

Puntos Matag Usa

ALIT’Z (62) – Malahos 16, G. Antigua 10, Nadera 8, Del Castillo 7, Mosqueda 7, Grafe 4, Principe 2, Sayson 2, D. Antigua 2, Malig-on 2, Neri 2.

BULLDOG (61) – Grafe 12, F. Antigua 9, Ygot 9, Bacus 7, Ouano 6, Mosqueda 6, Apa Jr. 5, Apa Sr. 4, Nadera 3. (BANAT NEWS)