MP Brokers miabante sa semis BOC-CIPU

CEBU, Philippines – Wala hatagi'g igong higayon sa MP Brokers nga makahuyo ang Lao Brokers human sila mo-iskor og 93-67 nga kadaugan aron moabante sa semifinals sa 3rd season sa BOC-CIPU Friendship Cup basketball tournament kaniadtong Huwebes didto sa barangay Tinago gym, ning dakbayan.

Inspirado sa presensiya ni team owner Marty Pimentel, nag-aso sa kainit ang MP Brokers ug lakip sa nagmangtas mao ang anak ni Marty nga si Nikki kinsa mihimo'g 11 puntos nga naglakip og usa ka three-pointer nga maoy labing maayo niyang duwa sa maong torneyo.

Ang MP Brokers kinsa nakabawos sab sa paglubong kanila sa Lao Brokers atol sa elimination round, gipangulohan nilang ex-UC Webmasters Daniel Enriquez ug Janus Abellana kinsa parehong miposa og 16 puntos matag usa.

Laing duha ka teammates ang mibahug sab og double figures nga silang Beking Rollon ug Jaymar Elloren sa ilang 12 ug 10 puntos, matag usa.

Nagpungasi nga fastbreak points ang gipahamtang sa MP Brokers ngadto sa Lao Brokers ilabi na kay mi-epekto ang ilang full-court trapping defense.

Sa laing bahin, bag-o na karon ang mga opisyales sa BOC-CIPU human sila mopahigayon og piniliay dili pa lang dugay ug ang napiling bag-ong presidente nga maoy mopuli kang Customs Police Boodie Monteno mao si Ryan Barral sa no.2 seed Alin Brokers.

Gawas kang Barral ang laing mga napiling opisyales alang sa tuig 2015 mao silang Baeng Medalle sa MP Brokers isip vice-president, Edwin Carmen sa Ynah Brokers isip secretary; auditor Rex Darious Bensi sa MP Brokers, PRO Noel Medalle sa MP Brokers ug Sergeant-At-Arms Jan Adam Mose sa Customs Task Force.

Puntos matag usa:

MP Brokers (93)?   Enriquez 16, Abellana 16, Rollon 12, Pimentle 11, Elloren 10, B. Medalle 7, N. Medalle 6, Arreglo 6, Amistoso 5, Bensi 3, Pangue 2.

Lao Brokers (67)?   Plando 13, Ramos 10, Jadraque 9, Factor 9,Velasquez 6, Davila 6,  Amaro 5, Baguio 5, Almendras 5, Bugtai 4. (BANAT NEWS)