P65T gitagana alang sa Tuburan chessfest

CEBU, Philippines - Mokabat ngadto sa P65,000 nga ganting salapi ang giandam alang sa mga mananaog sa 2nd Mayor Democrito M. Diamante Jr. Chess Team Tournament nga gitakda karong Disyembre 27-28 didto sa town plaza sa Tuburan, Cebu.

Hiniusang proyekto sa  Cebu Executives and Professionals Chess Association  (CEPCA) ug sa Province of  Cebu ubos sa liderato ni Gov. Hilario ‘Junjun’ Davide III ug Vice  Governor Agnes Magpale, ang duha ka adlaw nga kompetisyon moganti og P25,000 ngadto sa kampiyon. Ang second ug third placers makadawat og P15,000 ug P10,000 matag usa, samtang ang ikaupat hangtod sa ikaunom mobulsa’g P7,000, P5,000 ug P3,000. Bukas kini sa tanang mga dakbayan gawas lang sa Cebu City ug sa mga munisipalidad sa Sugbo, ang matag koponan langkuban og  upat ka regular players ug usa o duha ka alternates. Matag miyembro kinahanglan register voter sa munisipalidad/siyudad nga iyang representahan.

Alang sa dugang mga kasayoran, kontaka lang si FIDE Arbiter Marvin Y. Ruelan sa 0926-7352951. (BANAT NEWS)