3rd Royal Run gitakda karong Domingo
CEBU, Philippines – Gipaabot nga kapin sa 1,000 ka runners ang modagan sa 3rd edition sa Hotel Elizabeth ‘Royal Run’ karong Domingo diha sa the Terraces sa Ayala Center-Cebu.
Giisip nga usa sa mga labing malampusong running event sa Sugbo nga gipasiugdahan sa usa ka hotel chain, ang Royal Run adunay 21K, 10K ug 5K categories. Adunay kategoriya alang sa mga langyaw’ng runners.
Si hotel manager Katherine Angala nagkanayon nga ang lumba karong tuiga mas daku tungod kay aduna sila’y daghan giandam nga premyo ug surprisa sa mga runners.
“We are not making money out of this. Instead, we want to give more to them (Cebuano running community),” matud pa ni Angala atol sa press conference kagahapon. “Also aside from giving fun and promoting health and wellness, this event will once again be a run for a cause.”
Sama sa unang duha ka edisyon, ang halin sa lumba gamiton alang sa ilang beneficiary, ang Jesus and Elizabeth Fernando Foundation nga mohatag og financial assistance sa mga kabus nga tinun-an ug mga retired musicians.
Dul-an sa P150,000 nga ganting salapi ug gift certificates ang nagpaabot sa mga winners sa matag kategoriya. Usa ka specially-designed ‘dog tag’ usab ang madawat sa mga finishers.
Adunay raffle draw human sa lumba ug live band sa duha ka sikat nga Manila-based Cebuano bands nga Urbandub ug Franco.
Ang registration fee nagkantidad og P450 sa 21K, P350 sa 10K ug P300 sa 5K libre na niini ang singlet, race bib ug post-race refreshments. Mahimong magparehistro sa Hotel Elizabeth, JB Music and Sports ug Active Zone sa Ayala Center-Cebu. (BANAT NEWS)
- Latest