Pilde gyud!

CEBU, Philippines - Wala makalahutay ang Smart Gilas Pilipinas ug napilde gyud kini ngadto sa mas tag-as nga Croatia, 78-81 pinaagi sa overtime sa pagsugod sa 2014 FIBA World Cup kagabii didto sa Seville, Spain.
Apan wala damha nga mahatagan nila’g lisud nga duwa ang Croatia ug gani naka-overtime pa kini.
Ang Gilas misulod sa duwa nga grabe ka ‘underdog’, apan ang mga Pinoy cagers mipakita og grabeng determinasyon nga makakuha og daog sa labing unang higayon nila nga pagbalik sa World Cup human sa kapin 30 ka tuig nila nga pagkawala sa eksena.
Batok sa mga tag-as nga Croatians, ang Gilas naglisud sa pagsugod sa duwa ug gilubong sila, 23-9 sa first period.  Ang NBA naturalized center nga si Andray Blatche wala magpapugong sa rebounding, samtang misulod sab ang  mga tres si Jeff Chan sa dayong tapos sa second period aron pahakan ang labaw ngadto na lang sa 31-37.
Daw nakuha sa Gilas niadtong tungora ang momentum ug walay hunong nga nakigsinukliay og puntos hangtod nga miabot na lang sa kuwatro ang labaw sa Croatia, 46-50 human sa jumper ni Blatche.
Sa fourth period, nagtusak-tusak ang three-pointer nilang Blatche ug Chan ug ilang natabla ang duwa 64-all sa katapusang 3:50.
Milabaw pa ang Gilas, 69-66, apan kalit usab kining nahanaw human sa tira ni Ruku Ukic, 71-69.
Dumadaog na unta ang Gilas dihang nagtabla kini, 71-all, apan giluwa sa ring ang last second shot ni Chan nga naghatod sa duwa ngadto sa overtime.
Kulba gihapon ang aksiyon sa overtime kay magbanos-banos  og labaw ang duha ka kampo, apan  sa  kaulahian ang Croatia maoy mipatigbabaw.
Ang Gilas  makigsangka sa Greece, ang laing world powerhouse team karong adlawa.  (BANAT NEWS)