Spanish coach motabang sa Gilas Pilipinas

CEBU, Philippines - Dili lang line-up sa mga magduduwa ang gipalig-on ni Smart Gilas coach Chot Reyes, apan lakip na usab ang iyang coaching staff tungod kay ning labing uwahi, gikuha niya ang serbisyo ni Spanish coach Natxo Lezcano.

Ang Gilas gitabangan sab ni kanhi head coach sa New Zealand team nga si Tab Baldwin, kinsa nagsilbeng skills coach sa mga Gilas cager nga mosalmot sa 2014 FIBA World Cup didto sa Spain sa Agosto 30.

Si Reyes nagkanayon nga daku og matampo si Lezcano sa Gilas ilabi na batok sa mga African teams. Si Lezcano maoy kanhi coach sa Ivory Coast.

Ang Gilas kinahanglan og duha ka daog aron moabante sa second round sa World Cup. Una nilang sangkaon ang Croatia sa Agosto 30, Greece sa Agosto 31, Argentina sa Septiyembre 1, Puerto Rico sa Septiyembre 3 ug Senegal sa Septiyembre 4. (BANAT NEWS)