UC Juniors Gisubha’g daog sa CESAFI 2014

CEBU, Philippines - Midaog dayon ang University of Cebu (UC) Junior Webmasters  human ilang giihaw ang  University of San Jose- Recoletos (USJ-R) Baby Jaguars, 69-55 sa pagbukas sa 14th season sa Cebu Schools Athletic Foundation, Inc. (CESAFI)  kagahapon didto sa Cebu Coliseum.
Ning pagsuwat, padayon pa nga nagkumbati ang UC Webmasters ug ang USJ-R Jaguars sa collegiate division.

MGA DUWA KARON
(Cebu Coliseum)
1:00 pm
USC vs. DBTC (Sec.)
2:30 pm
UV vs. CIT-U (Sec.)
4:00 pm
UV vs. CIT-U  (Coll.)
5:30 pm
SWU vs. USC (Coll.)
Dili unta layo ang iskor  sa halftime, 29-23 ug misikit pa gani ang USJ-R sa third period, 33-29,  apan ang UC miarangkada aron tapuson ang maong kuwarter sa iskor nga 51-37. 
Ang UC nakahimo pa paglubong  og 18 puntos, 57-39 maoy labing daku nila nga labaw, apan  bisan pa niana, kanunay gihapon mohulga pagsikit ang Baby Jaguars.
Kugi sa depensa ug maayong gameplan maoy gipakita sa UC nga nagpamatuod sa mga gipamulong ni team manager Atty. Baldomero C. Estenzo nga daku'g purohan nga moabante sila sa semifinals karon nga season bisan sa wala pa magsugod ang CESAFI.
Ang shooting guard nga si Richestel Isla mao ang nangu sa UC sa iyang 19 puntos, ang  starting point guard nga si Darrel Shane Menina miamot og 13 puntos, samtang ang power forward nga si Arvin Dungog mitampo’g 10 puntos.
Ang USJ-R mi-rally sa katapusang higayon  sa nahabiling usa ka minuto sa duwa, 55-63, apan wala gihapon sila molampos kay mobawos man sab ang UC.
Si Bryan Divinagracia maoy nanginit og maayo sa napildeng USJ-R nga miposa’g 16 puntos, apan medyo namugnaw ang iyang duwa sa fourth quarter. Si John Nigel King miamot og 14 puntos ug ang rookie guard nga si Marmar Rubas mitikdol og 11 puntos. (BANAT NEWS)

PUNTOS MATAG USA
 
UC (69) –  Isla 19, Menina 13, Dungog 10, Quiamco 9, Canonigo 7, Gabisan 4, Abejo 4, Carpio 2, Dela Rama 1.
USJ-R (55) –  Divinagracia 16, King 14, Rubas 11, Lapinid 4, Belano 3,  Mutya 3, Gonato 2, Manalo 2.