Tecson miluwas sa maroon-JIB autoparts
CEBU, Philippines - Ang krusyal nga tira ni Alex Tecson sa hinapos nga bahin sa fourth quarter maoy midan-ag sa dalan alang sa Maroon team ngadto sa kadaugan.
Ang Maroon nakaipsot sa kulbahinam nilang duwa batok sa Gray, 74-71 sa SRP Sunday Club 6th Founding Anniversary League basketball tournament diha sa Brgy. Subangdaku, Mandaue City.
Ang playmaker nga si Tecson igo lang miiskor og kuwatro puntos, apan bililhon kaayo ang iyang katapusang itsa sa himalatyong segundos nga nakapabuhi sa dugo sa Maroon nga gipaluyohan sa JIB Auto Parts.
Si Joel Aniñon mikadlit og 16 puntos, samtang si Benito Aton Jr. mikulit og 11 puntos alang sa Maroon nga mao na lang ang team sa liga nga wala makatilaw og pilde.
Milabaw og 15 puntos ang Maroon, 50-45, apan nahimong kulbahinam ang aksiyon dihang mi-rally ang Gray sa pagpangu nilang Marcial Marturillas ug Toto Cabrillas, gani nailog pa nila ang bentaha, 72-70. Wala hinuon kini magdugay kay mibawos ang Maroon pinaagi sa three-point shot ni Fredo Santome, 73-72 sa nahabiling sayes segundos sa third period.
Misamot kahinam ang duwa dihang nagpuli-puli’g labaw ang duha ka kampo sa final period diin miabante ang Gray, 91-90 sa katapusang 1:08.
Naungot ang iskor sukad niadto ug naugkat kini pinaagi sa crucial basket ni Tecson, nasundan og laing dos puntos ni Fernando ‘Pitpit’ Anghay nga maoy miselyo sa ilang kadaugan.
Sila si Marturillas ug Cabrillas mihabwa’g 23 ug 21 puntos matag usa alang sa napilding koponan.
PUNTOS MATAG USA
MAROON (94) – Aniñon 16, Aton 11, Rodriguez 8, Anghay 8, Cabunilas 6, Labastida 4, Pilapil 4, Teody 4, Tecson 4, Obra 4, Colina 3, Ouano 2.
GRAY (91) – Marturillas 23, Cabrillas 21, Cajes 11, Gastardo 9, Dublin 9, Lubedica 8, Lepiten 6, Rico 2. (BANAT PALARO)
- Latest
