Maroon midaog gyud batok White

CEBU, Philippines - Midaog gyud ang team Maroon sa makutas nila nga duwa batok sa White team, 81-74 sa SRP Sunday Club 6th Founding Anniversary League basketball tournament niadtong Domingo diha sa San Roque Parish gym sa barangay Subangdaku, Mandaue City. Ang troika nilang Joel Aniñon, Benito Aton ug Eric Obra maoy responsabli sa kadaugan sa Maroon nga miwadwad og maayo ilabi na sa final period. Si Aniñon mikimada og 15 puntos aron pangulohan ang Maroon, gisundan ni Aton sa iyang 14 puntos ug Obra nga adunay 10 puntos.

Ang Maroon nga gipaluyohan sa J&B Autoparts maoy naggukod sa unang duha ka kuwarter ug gani gilubong sila og 14 puntos, 20-34 kapin sa tres minutos sa dili pa ang halftime.    Nailog sa Maroon ang labaw sa  labing unang higayon sa iskor nga 44-42 sa third period human sa basket ni Fernando 'Pitpit' Anghay ug sukad niadto wala na makarekober ang White team nga nagkagidlay  human malabwi.

Si Abner Ona maoy nangu sa White nga miratsada'g 24 puntos, si Alex Abano mitimang og 13 puntos, samtang sila si Ronnie Alvarado ug Roldan Baloro mitimbre'g 10 puntos matag usa alang sa kapildihan.

Sa laing duwa,  ang team Orange milansang sa ilang ikaduhang daog  pinaagi sa paglubong sa Green team, 97-86.

Si Gideon Ipili maoy topscorer sa Orange team pinaagi sa iyang 20 puntos, gisundan ni Dodod Colina  sa iyang 15 puntos, diin 13 niini nahimo sa second quarter ug Richie Tecson nga adunay 14 puntos.    Ang napildeng Green gipangulohan ni Jojo Menaling, kinsa mipabuto'g 22 puntos. Nakakuha sab siya og suporta gikan nilang Jessie 'B-Jess' Bacunawa ug Benjie Pelarios nga parehong miiskor og 12 puntos.

PUNTOS MATAG USA

Unang duwa:

ORANGE (97) – Ipili 20, Colina 15, Tecson 14, Perolino 6, Labares 6, Bobong 6, Aventajado 6, Sergio 6, Rhamon 6, Gonzaga 5, Cariño 4, Ortiz 3.

GREEN (86) – Menaling 22, Pelarios 12, Bacunawa 12, Gingco 8, Pescante 8, Miñoza 7, Atillo 6, Rivas 3, Simbajon 3, Alesna 3, Dialogo 2.

Ikaduhang duwa:

MAROON (81) – Aniñon 15, Aton 14, Obra 10, Teody 9, Labastida 6, Anghay 5, Tecson 5, Pilapil 4, Rodriguez 3, Ouano 2, Cortes 2.

WHITE (74) – Ona 24, Abano 13, Alvarado 10, Baloro 10, Aposaga 6, Obejanda 5, Hucamis 4, Lipogpog 2.