Kamangay sa Waterfront

CEBU, Philippines - Misaad ang managsuong boksidor nga  sila si Jason 'El Niño' Pagara ug 'Prince' Albert Pagara nga mohimo'g "knockout" batok sa tagsa-tagsa nilang kaatbang sa "Pinoy Pride 26: Fists of the Future" karong gabii diha sa Pacific Grand Ballroom sa Waterfront Cebu City Hotel and Casino.

Pulos sila sumusulbong sa ilang dibisyon ug ang managsuong boksidor gusto nga mopakita nga andam na sila sa mas dagkung away ug ingon man kahigayonan nga matuman ilang damgo nga mahimong world champion.

Si Jason (33-2, 20KOs) modepensa sa iyang WBO International light welterweight title batok ni Mexican brawler Mario 'Rocky' Meraz (20-3, 16KOs), samtang si Albert  moilog sa  bakanteng IBF Intercontinental light featherweight belt batok ni Hugo 'Olimpico' Partida (21-4, 16KOs).

"Mas kusgan mi kun magdungan mi og away (sa usa ka fight card)," matud pa ni Jason nga mitimbang og 139.5 lbs. nga ubos og tunga sa libra ni Meraz.

"Wala ko mapresyur nga moaway sab ako manghod una nako, makahatag hinuon siya og inspirasyon labaw na kun  matumba niya og una iyang kontra."

Si Pagara ranked No. 4 sa  WBO  namasin og kahigayonan nga moaway sa WBO title nga kasamtangang gihuptan ni undefeated American Chris Algieri.

Sa iyang bahin, si Albert nga hapit makigsukmagay sa Mehikanong kontra atol sa weigh-in, mibahad nga tumbahon gyud niya si Partida aron makuha ang labing una niyang regional championship belt.

"Sayop to iyang (Partida) gibuhat kay iya nuon ko gidasig nga tumbahon siya sa among away," matud pa ni Albert. "I-knockout gyud na ko ni akong kontra para pud ganahan akong maguwang sa iyang away sunod nako."

Sa undercards, si AJ 'Bazooka' Banal (30-2, 21KOs) makigsukmagay ni unbeaten Indonesian Defry 'Hammer' Palulu (10-0, 9KOs), samtang si Jimrex Jaca (30-0, 22KOs) makigbinukbukay ni Japanese Masayoshi Kotake (9-8, 5KOs).