Pagara batok Mexican Knockout artist

CEBU, Philippines - Ipadayon ni WBO International light welterweight champion Jason 'El Niño'

Pagara (32-2, 19KOs) ang iyang tahas nga mabantog isip usa sa mga elite fighters sa iyang dibisyon   dihang batukan niya si Mexican knockout artist Mario 'Rocky' Meraz (20-3, 16KOs) sa main event sa "Pinoy Pride 26: Fists of Future" sa Hunyo 21 didto sa Waterfront Cebu City Hotel and Casino.

"We should understand that Jason (Pagara) belongs in the most competitive division (140 lbs.) stacked with elite and dangerous fighters," matud pa ni ALA Promotions President and CEO Michael Aldeguer sa press conference kagahapon didto sa St. Mark Hotel.

"There are certain things we are trying to see (from Jason) if he really is a contender in the light welterweight division."

Si Pagara gitan-aw nga usa sa mga ALA boxers nga adunay dakung potensyal nga mahimong world champion, apan tungason kini tungod kay nabutang siya sa weight division diin nagpundok ang mga  banggiitang boksidor.

Kini naglakip nila ni WBO titlist Ruslan Provodnikov, IBF title-holder Lamont Peterson ug WBA champion Danny Garcia. Anaa usab ang ubang contenders nga sila si Adrien Broner, Lucas Matthysse ug Amir Khan.

Wala hinuon malisang si Pagara kay daku kini'g pagsalig sa iyang abilidad nga makatupong sa kusog sa mga boksidor.

Sa iyang bahin, si ALA trainer Edmund Villamor nagkanayon nga nakita ug gitun-an na niya ang lihok ni Meraz ug  makahatag kini og nindot nga away ni Pagara.

Sa supporting bouts, ang manghod ni Jason nga si 'Prince' Albert Pagara (19-0, 13KOs) mosukod sab sa abilidad ni ex-Olympian  Hugo 'Olimpico' Partida (21-4, 16KOs) sa Mexico.

Moaway usab si AJ 'Bazooka' Banal (30-2, 21KOs)  batok ni Defry 'Hammer' Palulu (10-0, 9KOs), samtang si Jimrex 'Executioner' Jaca (39-7, 22KOs) makigbatok ni Japanese Masayoshi Kotake (9-8, 5KOs). (BANAT NEWS)