White, Blue midaog

CEBU, Philippines -  Nagmangtas si Miguel 'Juancho' Cenabre sa final period diin miiskor siya og 11 puntos sa kinatibuk-an niyang 26 puntos alang sa Blue team nga milubong sa Red team, 65-50 sa nagpadayong aksiyon sa Pagsabungan Thursday Club (PTC) basketball tournament didto sa Barangay Pagsabungan Gym, dakbayan sa Mandaue.

 Gidominar sa Blue team ang unang-duha ka kuwarter, apan misarasay kini sa third period dihang ang Red team ni playing coach Romy 'Meox' Basirgo mi-rally aron mailog ang momentum.

 Sila si Jun Toso ug Tata Camelon maoy miduslit sa mainitong rally alang sa Red team diin nagkumboya sila'g 29 puntos sa maong duwa.

 Ang foul-troubles maoy nahimong dakung babag sa tinguha sa Red team. Naglisud na sila sa pagpatuman sa ilang hugot nga depensa hinungdan nga gipaligasan na lang sila sa mas batan-on nga Blue team nga miilog pagbalik sa labaw sa kapin sa tres minutos ang nahabiling oras sa duwa.

 Ang Blue team nakakuha sab og suporta gikan nilang Messiah Mark Abayan, kinsa mikadlit og 14 puntos ug Wilfredo 'Ken' Jison nga mitikdol og 13 puntos nga gilamasan og tulo ka three-pointers.

 Sa pasiunang duwa, ang White team nakalingkawas gikan sa makutas nga aksiyon batok sa Green team sa iskor nga 42-39.

 Si Arnel Ochea mikamada'g 16 puntos aron pangulohan ang White team, kinsa miposte'g 15-9 nga bentaha paghuman sa first quarter. Gisundan ni Lito Montes sa iyang 15 puntos. Bugtong si Harold Boton lang ang miiskor og double-figures alang sa napildeng Red team nga adunay 12 puntos.

 Ang torneyo gipasiugdahan ni  Romy 'Meox' Basirgo.

PUNTOS MATAG USA

Unang duwa:

 WHITE (42) – Ochea 16, Montes 15, Dacquiado 6, Mondijar 2, Tapic 2, Ranile 1.

 GREEN (39) – Boton 12, Mendoza 8, Andres 8, Ceniza 6, Bing 3, Monzolin 2.

 Ikaduhang duwa:

 BLUE (65) – Cenabre 26, Abayan 14, Jison 13, Ouano 5, Calvez 4, Ranile 3.

 RED (50) – Toso 15, Camelon 14, Berdena 5, Basirgo 4, Hantod 3, Rivera 2, Catacutan 2.