Kontrang Casimero 1 round ra

CEBU, Philippines - Gitangtangan na sa iyang championship belt human wala niya makuha ang hustong timbang, gipakita gihapon ni Johnriel "Quadro Alas" Casimero nga anaa gihapon siya'y abilidad nga mokampiyon pagbalik human niya sayun nga gidispatsar ang Colombian nga si Mauricio Fuentes.

Ang pambato sa Omega Boxing Gym namungot nga mikulata ni Fuentes kinsa nalup-og sa oras nga 2:59 sa first round sa main event sa ‘Pinoy Knockout’ sa miaging gabii didto sa Waterfront Hotel and Casino sa Brgy. Lahug, ning syudad.

Si Casimero gihubuan sa iyang bakus atol sa weigh-in human siya mapakyas pagkuha sa 108 lbs. limit, apan wala siya mawad-i og gana nga mopakita sa iyang kusug atubangan sa  iyang mga fans.

Napatumba dayun ni Casimero si Fuentes pinaagi sa iyang kombinasyon sa ulo sa Colombian. Nakabangun pa si Fuentes apan dali siyang gitiwasan ni Casimero sa wala pa kini nalup-og ug giundang ni referee Gerard White ang away.

“Gusto gyud nako ipakita nga champion ko,” matud pa ni Casimero. “Giplano gyud nako ang knockout pero wa ko magdahum nga ingun ato ka sayo.”

Si Casimero musaka na sa 112 lbs. diin gusto niya nga mokampiyon pagbalik pinaagi sa paghagit sa mga kampiyon sa maong dibisyon sama ni WBO ug WBA king Juan Francisco Estrada sa Mexico.

“I want him to fight first in a non-title bout for his flyweight debut. After that, I would look for a chance if he can challenge for a world title,” matud pa sa promoter ni Casimero nga si Sammy Gello-ani.

Sa supporting bouts, ang Filipino prospect Harmonito de la Torre (13-0,8KOs) milangkat  sa  WBF International super featherweight crown pinaagi sa fourth round TKO ni Flores Boxing Stable’s Gadwin Tubigon.

Si Jessie Cris Rosales milabni sa WBO Youth Asia-Pacific featherweight belt batok ni Anthony Sabalde pinaagi sa unanimous decision, samtang si Omega Boxing Gym rising star Jhack ‘Golden Boy’ Tepora mipaundang ni Joash Apericio sa round 10 aron makuha ang WBF Asia-Pacific super bantamweight championship.  (BANAT PALARO)