Azkals, Tigers maglayog

CEBU, Philippines - Magkuros na usab ang dalan sa Philippine  Azkals ug Malaysian Tigers sa "Face Off  2"  karong alas-7 sa gabii diha sa Cebu City Sports Center (CCSC).

 Ang Azkals ug Malaysia nagsangka na sa ikatulong higayon sud sa tulo ka tuig diin ang tanan duwa pulos miresulta sa "draw."

 Ning higayona, ang Azkals kompiyansa nga  modaog batok sa mga Tigers.

 Si Thomas Dooley, ang bag-ong coach sa Azkals miingon nga daku ang iyang  kahigayonan nga modaog, apan daku og papel sa ila unyang kadaugan ang  suporta gikan sa mga Cebuano football fans nga mosaksi sa duwa.

 "I hope for a sold out crowd. It is a very important game in preparation for the Challenge Cup. It's always good to have a home game to send us off to a very important competition," matud pa ni Dooley atol sa  press conference kagahapon didto sa Parklane International Hotel.

 Lakip sa mga mobida sa Azkals mao sila si Jason de Jung, Eduard Sacapano, Carli de Murga, Jerry Lucena, Martin Steauble, Chris ug Simon Greatwhich ug James Younghusband.

 Hinuon, miangkon ang kampo sa Tigers nga lisud harungon ang Azkals  tungod kay wala ang pipila nila ka mga sinaligan, apan malaumon sila nga modaog.

 "It will be tougher than the last time because we will not only be playing against the players but also against the home crowd, but we are prepared," segun pa ni Malaysian coach Datuk Ong Kimsee.

 Human sa maong friendly game, ang Azkals moduwa na sa AFC Challenge Cup sa Maldives sunod buwan diin ilang unang sangkaon ang mga Asian teams sa ilang bracket nga naglakip sa Laos, Turkmenistan ug Afghanistan. (BANAT NEWS)