Hawks no. 8 sa east

CEBU, Philippines - Daan nang nagtuo si Jeff Teague nga mosulod gyud ang Atlanta Hawks sa playoffs.

Tuod man, midaug ang Hawks batok sa Miami Heat, 98-85 kagahapon didto sa Philips Arena sa Atlanta, Georgia.

"I'm happy for all the guys. We worked so hard all year. Injuries and everything that can happen to a team happened. We were able to still make it to the playoffs.''

Bisan og wala na si Al Horford tungod sa iyang season-ending injury niadtong Disyembre diin mihimo sila'g 1-14 nga baraha niadtong Pebrero ug Marso.

Ang Hawks mi-abante na sa playoffs sa Eastern Conference sa ikawalong dapit ug dunay duha pa ka duwa ang nahibilin.

Si Teague mibahug og 25 puntos samtang may 23 si Lou Williams diin ang 18 puntos niini pulos didto sa fourth quarter.

Ang Hawks kinsa midaog na og tulo ka sagunson nga duwa, mitagak sa New York Knicks. Si Williams maoy mihimo sa kataposang 12 puntos sa Hawks.

Si LeBron James maoy nangu sa Heat sa iyang 27 puntos ug midugang si Dwyane Wade og 24 puntos sa iyang pagbalik ug duwa.

Sa kasamtangan, nagtabla ang Miami ug Indiana alang sa Eastern Conference sa ilang 54-26 nga baraha. Ang 85 puntos sa Miami maoy tulo sa labing ubos karon nga season.

''It's not finished. I see the standings. There's a couple games left and the seeding is changing every day,'' matod pa ni James.

Dihang nagdungan og sulod silang James ug Chris Bosh sa kataposang 6:42 ang oras sa duwa, nabiyaan gihapon ang Miami, 72-81. 

Sa laing duwa, midaug ang Boston batok sa Cleveland, 111-99, naka-ipsot ang Dallas batok sa Phoenix, 101-98, gilubong sa L.A. Clippers ang Sacramento, 117-101, gipukan sa Washington ang Milwaukee, 104-91, midaug ang Charlotte batok Philadelphia, 111-105 ug midaug ang Denver batok sa Utah, 101-94. (GGM)

Cabagnot bayani sa GlobalPort

Mipatusak og usa ka three-point shot sa nahibiling 10.9 segundos si Alex Cabagnot aron luwason ang GlobalPort Batang Pier batok sa Barako Bull Energy Cola, 98-96, kagahapon didto sa Smart Araneta Coliseum.

Sa maong kadaugan, gihatagan ni Cabagnot sa labing una nilang daog ang GlobalPort nga miputol sa nagkadinang walo nila ka sunod-sunod nga pilde.

Naglabaw og 21 puntos ang GlobalPort sa wala pa sila gukora sa Barako Bull nga mitabla sa iskor 93-all sa katapusang 59 segundos sa duwa.

Apan inay maluya sa gibuhat nga rally sa Barako, mipatigbabaw hinuon ang kaisug ni Cabagnot kinsa way pagduha-duha nga mibuhi sa iyang tres nga maoy yawi sa kadaugan sa GlobalPort.

Si Cabagnot mitapos sa duwa nga adunay 14 puntos, siyam ka assists ug upat ka steals. Ang Barako Bull nga natagak na usab sa elimination natagak sa record nga 2-7. (BANAT NEWS)