Calambua mo-host sa 15th Ornopia cup

CEBU, Philippines - Walay kabutangan sa kalipay sa mga  daredevils dinhi  sa  Sugbu ang pagbalik ni Lou Ornopia sa iyang MS Motosuit Series human kini nawala sa miaging tuig.

 Ang kalihukan pormal nga gilusad pag-usab atol sa senemanang SCOOP Forum kagahapon didto sa Cebu City Sports Center  (CCSC)  conference room.

 Kapin sa 100 ka daredevils gikan sa Sugbu  ug sa ubang mga dapit sa Visayas ug Mindanao nga mopakita sa ilang abilidad sa  first leg nga uloha'g 15th Ornopia Cup karong  Domingo didto sa world-class race tracks sa Brgy. Calambua, San Remigio sa amihanang Sugbu.

 Si  Ornopia, kinsa mao sab ang barangay captain sa Calambua,  maoy  nagtukod sa MS Motocross Series.

 Sa unom ka initial legs, tulo niini adto ipahigayon sa  Calambua aron kapahimuslan  ang  race track.

 Si  Pepo Rubi, ang Cebu's living legend sa motocross mao ang nagdesinyo sa race track. Matud pa niya nga  walay laing natural tracks sama niini sa Visayas region.

 Sa unang  14  ka  tuig,  ang Ornopia Cup  adto kanunay himuon sa natural terrain  ug ning higayona,  ang ika-15 nga edisyon giisip nga labing  nindot kay tibuok bukid na ang magamit alang sa maong kalihukan.

 "In the previous years, we are only utilizing one-fourth of the mountain, this time, we are going to race in the entire mountain, two mountains actually that makes this a very challenging one both for the veterans and beginners," matud pa ni Rubi.

 Nakahukom si Ornopia pagbalik  sa iyang series tungod sa walay hunong nga suporta sa local riders.

 "Although there is also a national series that is being organized by M & M (Man and Machine), pero nothing that is for Cebu only. When MS Motosuit ended, kami pung mga local riders, nahugno. Pero karon, with the revival,  nabuhian pud mi'g interes,"  dugang pa ni Rubi.

 Mga kategoriya nga kumbatihan mao ang  mini 60cc ug 85cc, beginners, local enduro, open enduro, executive A, B  ug  C, novice, intermediate, expert ug pro open.

 Ang 15th Ornopia Cup magsilbeng highlight sa tinuig nga kapistahan  sa Calambua pahinungod sa  ilang mahal nga patron San Vicente Ferrer.

 Gipaluyohan kini sa F & FO Motor Parts, JCO Motor Parts, Prospeed, Speed-up, Quick Flight, Motomaze, Keiz BJ Motors, Bradder Moto Access, RMO Motor Parts NF Motor Parts, Aike Motor Parts, Ljun Motor Parts, Sanitech, Dr. Andy Uy, Jonathan Cuyos, Edwin Dilao, Ramon Montealto ug Diosdado Navarez.

 Ang tanang lumba sa MS Motosuit Series makita sab sa CCTN Channel 47. (BANAT PALARO)