7th Olango Challenge gitakda sa Mayo 17

 CEBU, Philippines - Gilusad na ang ikapitong edisyon sa Olango Challenge   nga gikatakda sa Mayo 17 didto sa  Crimson Resort and Spa sa dakbayan sa Lapu-Lapu.

 Tuyo ug tumong sa  maong  kompetisyon mao ang pagtukod og dugang classrooms didto sa isla sa Olangpo.

 Sukad namugna ang kalihukan niadtong 2007, ang organizing Philippine Business for  Social Progress (PBSP) uban sa Philippine Swimming Inc. nakapabarog na og tulo ka two-class buildings sa tulo ka nagkalain-laing mga barangay sa Olango.

 Ang ikaupat padayon pa nga gitrabaho dihang ang ilang manpower resources gipadala alang sa rehabilitation projects sa mga lugar nga naapektohan sa mga kalamidad nga miigo sa rehiyon sa miaging tuig.

 Si PBSP Visayas chairman Antonio Aboitiz  nagkanayon nga nakatigum sila og P4  million sa unom ka edisyon. Nagpasalamat siya ngadto sa mga partisipante, ilang pamilya, kahigalaan ug corporate sponsors nga misuporta sa maong kalihukan.

 Ang ikapitong edisyon sa Olango Challenge naglatid sa 6K ug 2K distance sa competition ug fun swimmers.

 Ganting salapi ang ihatag ngadto sa top performers.

 Gidasig ni Aboitiz ang tanan nga mahimong kabahin sa "pledge system"  kay ang registration fee dili paigo aron makatigum og dakung pundo.

 "The registration fee alone cannot come up with a lot of funds. As always, this is not a money-making event. So we hope companies, the swimmers' family and friends will also go and pledge donations," matud pa ni Aboitiz.

 Niadtong buot mosalmot ug motabang, mahimong motawag sa PBSP Visayas regional office sa (032) 232-52283 o 232-5270 o sa e-mail: [email protected]. (BANAT NEWS)