Team Bastida, Lim team gisubhan dayon og daog

CEBU, Philippines - Nagpauwan og 10 ka 3-pointers ang Team Bastida nga igo gyud nakalubong sa Team Endab, 127-101 pagsugod sa First  Conference sa As-Es-B.A.R. basketball tournament niadtong Lunes sa gabii didto sa Benjamin Solon Memorial Gym sa Brgy. Cogon Ramos, ning siyudad.

 Ang kadaugan maoy labing taas nga iskor sa kasaysayan sa liga nga kaniadto gitawag pa og Ramos Basketball Association (RBA).

Si Lito Aniñon maoy daghang napasud nga tres nga adunay lima sa kinatibuk-an niyang 15 puntos, gisundan ni kanhi CSAT Builders Reynaldo Zamora, kinsa mitusak og tulo. Apan si Zamora maoy topscorer sa Team Bastida nga miposa og 27 puntos.

 Laing kanhi CSAT Builders nga si Noel Godiz mihimo sab og duha ka 3-pointers, samtang sila si Arvin Rodriguez ug Rocky Bacalso adunay tag-usa ka tres.

 Si Louie Tanggol miamot og 24 puntos ug si Jojo Pada mitampo'g 16 puntos alang sa Team Bastida nga gisubha'g daog sa maong liga nga gipasiugdahan sa As-Es Sportswear.

 Human mabiyai'g tres sa unang kuwarter, 17-20, ang  Team Bastida mi-rally sa second period pinaagi sa ilang mga fastbreaks ubos sa giya sa torotoy'ng pointguard nga si Tanggol. Ang Team Bastida milusad og 36-15 run aron lubagon ang iskor sa halftime, 53-35 pabor kanila.

 Gikan sa 18 puntos nga labaw, miburot pa ang labaw sa Team Bastida ngadto na sa 25 puntos paingon sa final period, 87-62 ug namintinar nila ang double digits nga bentaha hangtod nahurot ang oras sa duwa.

 Lima sab ka players sa Team Endab ang miiskor og double figures sa pagpangulo ni Tedong Mendiola pinaagi sa iyang 25 puntos. Si Arjohn Colinares miariya og 18 puntos, gisundan nilang Marvin Coyoca ug Kons Romeo nga mitimbre'g 16 puntos matag usa, samtang si John Torres mitikdol og 14 puntos sa kapildihan sa Team Endab.

 Sa opening game, ang Team Lim gisubhan sab og daog pinaagi sa pagpilde sa Team Arellano, 86-77.

 Sila si Glenn Birao ug Erwin Ferrer ang giilang Batman and Robin sa Team Lim nagkumboya'g 36 puntos aron luwason ang koponan human mabiyai'g otso puntos sa halftime, 33-41.

 Si Birao miratsada'g 20 puntos, samtang si Ferrer mikimada'g 16 puntos. Miabag sab sila si B. Alesna ug Nilo Dan-Dan nga miamot og 10 puntos matag usa.

 Ang naparot nga Team Arellano gipangulohan ni  Andrew Biton, kinsa mipabuto'g 22 puntos, si Arthur Arellano mihirit og 14 puntos. Sila si Dodong Rosaroso ug Andy Borres nagkumboya'g 22 puntos alang sa Team  Arellano nga wala na makarekober dihang mibahar ang ilang opensa sa second half.

PUNTOS MATAG USA

Unang duwa:

 TEAM LIM (86) - Birao 20, Ferrer 16, Alesna 10, Dan-Dan 10, Cabrera 6, Magsayo 6, Lim 4, Jurado 4, Esplanada 4, Abelgas 4, Ferrer 2.

 TEAM ARELLANO (77) - Biton 22, Arellano 14, Rosaroso 12, Borres 10, Fuentes 8, Regidor 5, Dela Calzada 3, Bernal 2, Sarda 2.

Ikaduhang duwa:

 TEAM BASTIDA (127) - Zamora 27, Tanggol 24, Pada 16, Aniñon 15, Rodriguez 10, Bacalso 8, Godiz 6, Lanutan 4, Rojas 4, Bastida 2, Villaver 2.

 TEAM ENDAB (101) - Mendoza 23, Colinares 16, Coyoca 16, Romeo 16, Torres 14, Endab 8, Conde 6