Heat midaog bisan wala si James

CEBU, Philippines - Wala  makaduwa ang superstar nga si LeBron James tungod  sa  buak sa  bukog  sa  iyang  ilong, apan nakahimo gihapon ang Miami Heat dihang ilang gipanitan ang Chicago Bulls, 93-79 sa nagpadayong  duwa sa  NBA kagahapon didto sa American Airlines Arena sa Miami, Florida.

Gumikan kay wala si James,  ang sentrong si Chris Bosh maoy miabaga sa opensa sa Heat nga mipabuhagay og 28 puntos uban sa iyang 10 ka rebounds.

Iya usab natupngan ang iyang career-high nga upat ka three-pointers. Si Dwyane Wade miabuno'g 23 puntos ug milangkat sab og 10 ka rebounds uban ang pito ka assists, samtang si Mario Chalmers  miamot og 12 puntos  sa maong kadaugan.

Wala   paduwaa si James tungod sa nabuak niyang ilong  dihang naigo kini sa bukton ni Serge Ibaka atol sa ilang kadaugan batok sa Oklahoma City Thunder  niadtong Huwebes.

Ang kanhi NBA No. 1 draft pick nga si Greg Oden maoy mipuli kang James isip starter nga maoy labing una niyang pagduwa isip starting five.

Sa laing duwa, ang NBA leading scorer nga si Kevin Durant mipadahunog og 42 puntos, apan wala kini makapausab sa dagan sa duwa  kay napilde ang iyang koponan batok sa Los Angeles Clippers, 117-125.

Si Jamal  Crawford mipakita sa iyang kaugalingong matang sa opensa dihang gipangulohan ang Clippers pinaagi sa iyang 36 puntos.

Nakakuha sab siya og suporta gikan ni  Matt Barnes nga mitampo'g 24 puntos  ug ni Chris Paul nga adunay 18 puntos uban ang 12 ka assists ug walo ka rebounds.

Si  Blake Griffin  miposa'g 20 puntos ug  si  DeAndre Jordan og 18 puntos uban ang 12 ka rebounds.

Sa lain pang mga aksiyon, ang Washington Wizards milubong sa Cleveland Cavaliers, 96-83, gilubong sab sa Toronto Raptors ang Orlando Magic, 105-90. Ang Sacramento Kings mipilde sa Denver Nuggets, 109-95.

Ang Houston Rockets nakalingkawas sa kainit sa Phoenix Suns, 115-112, ang Brooklyn Nets mipilde sa Los  Angeles Lakers, 108-102 ug ang Portland TrailBlazers miihaw sa Minnesota Timberwolves sa iskor nga 108-97.