Charter day cup sugdan karon
CEBU, Philippines - Dayag na lang nga mas paborito karong gabhiona ang Talk 'N Text Tropang Texters sa ilang pakigsangka batok sa amateur team Natumolan Tagoloan Tigers gikan sa Misamis Oriental sa pagsugod sa 2014 Charter Day Cup basketball tournament diha sa Cebu Coliseum.
Ang defending Commissioner's Cup champion Alaska Aces maoy mangulo sa tulo ka PBA team nga moduwa ning tulo ka adlaw nga torneyo. Ang laing duha mao ang Global Port Batang Pier ug Talk N' Text Tropang Texters.
Ang tulo ka PBA teams nga ubanan sa ilang tagsa-tagsa ka import moduwa sa torneyo nga magsilbeng tune-up game sa pagpangandam sa 2014 Commissioner's Cup nga sugdan sunod bulan.
Ang Aces ni coach Luigi Trillo moparada sa ilang sinaligang import nga si Rob Dozier Jr., samtang si Richard Howell sa Talk N' Text ug si ex-NBA cager Evan Brock sa Global Port.
Subling ikauban sa 6-foot-9 reigning "best import" nga si Dozier ang local Aces nga sila si Dondon Hontiveros, Aldrich Ramos, Calvin Abueva, Cyrus Baguio, JV Casio ug Sonny Thoss. Uban usab nila si Nic Belasco, Samigue Eman, Leo Avenido ug rookies nga silang Ryan Buenafe ug Chris Exciminiano.
Sa ilang bahin, ang GlobalPort angay atngan human sila malambigit sa usa ka 'blockbuster' trade diin nakuha nila ang veteran pointguard nga si Alex Cabagnot ug slasher Bon-Bon Custodio. Uban pang mga lokal nga mobida sa Batang Pier ni coach Pido Jarencio naglakip nilang Terrence Romeo, Jay Washington, Erik Menk, Justin Chua, Nic Salva, RR Garcia, Kelly Nabong ug Enrico Villanueva.
Ang Tropang Texters, moparada sa Smart Gilas cagers sama nilang Jimmy Alapag, Jayson Castro, Ranidel de Ocampo ug Larry Fonacier. Anaa usab sila si KG Canaleta, Danny Seigle, Larry Fonacier, Ryan Reyes ug Harvey Carrey. Moduwa usab uban nila silang KG Canaleta, Danny Seigle, Larry Fonacier, Ryan Reyes ug Harvey Carrey.
Ang upat ka teams moduwa og single round robin format diin ang koponan nga adunay labing daghan og daog maoy ilhong kampiyon.
Ang mga tiket sa maong duwa nagkantidad og P500 sa ringside, P400 sa stage, P300 sa lower box, P150 sa upper box ug P50 sa general admission. (BANAT PALARO)
- Latest
