Rambol

CEBU, Philippines - Mosaka sa ring si Genesis 'Azukal' Servania sa ALA Boxing  Gym uban ang paglaum nga makabawos ngadto ni Panamian Rafael 'El Torito'

Concepcion sa ilang WBO Intercontinental super bantamweight fight sa main event sa "Pinoy Pride XXII: The Revenge"  fight card karong gabii diha sa Pacific grand ballroom sa Waterfront Cebu City Hotel and Casino.

 Gawas sa paghatag og dungog sa nasud, si Servania (22-0, 8KOs) naglungot-lungot usab nga mobawos ni Concepcion (18-6, 8KOs) nga mipahingangha sa pipila ka mga Cebuano fans human niya  gipawong ang paglaum ni AJ 'Bazooka' Banal nga mahimong world champion lima na ka tuig ang milabay.

  Imbes  mahudlat   sa mga bahad ni Concepcion, si Servania mas agresibo na hinuon nga makigsangka ug mokulata sa  bisitang boksidor.

 "Confident kaayo ko, nindot ako pamati ron ug andam na ko sa among away. Ako siyang pildehon para sab sa akong stablemate (Banal) ug aron usab ipakita nako nga aduna ko'y potensyal mahimong world champion sa umaabot," matud pa ni Servania.

 Sila si Servania ug Concepcion parehong mitimbang og 122 lbs. atol sa official weigh-in kagahapon didto sa Active Zone sa Ayala Center Cebu.

 "This is my second time here and once again I will win here against Servania," bahad   ni Concepcion. "Whether it will be in the first or last round, I will surely knock him out when I catch him."

 Sa supporting main event, laing undefeated ALA warrior nga si  'King'  Arthur Villanueva (23-0, 13KOs) makigsangka  ni Mexican Edgar 'Chololo' Martinez (16-7, 10KOs) alang sa WBO International super flyweight title.

 Mobida sa undercard mao si kanhi IBO bantamweight challenger Roli 'Zuma' Gasca (20-4, 5KOs) nga makigsinukliay og kumo ni Indonesian Lande Olin (11-4, 7KOs), samtang si Mark Vincent 'Machete' Bernaldez (11-0, 7KOs) makigsinukmagay ni Thai Khunkhiri Wor Wisaruth (10-5, 5KOs).