Maraat, Velarde nanghawod

CEBU, Philippines -  Si Carlo Maraat ug ang batan-on apan masaarong si Jerish John  Velarde mitimbre og daog sa tagsa-tagsa nila ka dibisyon sa Cebu Executives and Professionals Chess Association (CEPCA) 23rd Anniversary Chess Open sa miaging adlaw didto sa The Event Centre sa SM City-Cebu.

 Si Maraat, kinsa mipukan ni Shaira Monsalud sa final match, maoy top performer sa special category nga eksklusibo   alang sa mga miyembro sa CEPCA uban ang 6.0 puntos. Si Peterson Sia, kinsa mitapos sa 9-round Swiss system competition bitbit ang 6.0 puntos mipahiluna sa ikaduha, gisundan ni Jimmy Ty Jr. nga adunay 5.5 puntos.

 Sa laing bahin, si  Velarde maoy nanghawod sa 10-under age-group nga adunay 5.0 puntos, gisundan nilang  Alphecca Gonzales ug Vic  Gyles Derotas sa iyang 4.0 puntos.

 Ang lain pang top performers mao ang 14-anyos nga si Rhenzi Kyle Sevillano (11-15 age bracket), Leonardo Alidani (seniors), Christian Yves Fiel (juniors) ug Laila Camel Nadeera (ladies).

 Si Sevillano mipatong sab sa ikaduha sa overall sunod ni grand champion NM Merben Roque. Mirehistro sila'g 8.0 puntos paghuman sa duha ka adlaw nga kompetisyon nga gipasiugdahan sa CEPCA ubos sa liderato sa ilang president Jojo Moralla sa pakig-alayon sa Sugbuanong chess patron Boojie Lim sa Rose Pharmacy Inc.

 Adunay kinatibuk-ang 156 ka partisipante ang misalmot sa kompetisyon nga nahimong posible pinaagi sa suporta ni Engr. Jemar Maratas sa Jemar Engineering Services, Lite Shipping, Atty. Jennoh Tequillo,  Andrew Aznar, Kelly Uy, Model Rent A Car ug sa charitable Cepcans.

  Ang mga duwa gidumala   ni tournament director Jun Olis  sa abag ni chief arbiter FA Felix C. Poloyapoy Jr., FA Marvin Y. Ruelan ug CA  Edwino Parilla III. (BANAT NEWS)