Medalle mibaswat sa Camansili

CEBU, Philippines - Wala kapugngi sa iyang pagmangtas si Noel Medalle kinsa miposa og 30 puntos aron pangulohan ang sitio Camansili ngadto sa paglampurnas sa sitio Callejon sa iskor, 100-86 atol sa pagbukas sa 1st Vic Buendia Cup Inter-Sitio basketball tournament didto sa barangay Labangon, ning dakbayan.

Gawas kang Medalle, miantug ang laing re-enforcement gikan sa FYA nga si Beking Rollon og 25 puntos samtang midugang si Noel Talas og 17 puntos alang sa Camansili ni coach Allan Trinidad.

Silang Medalle ug Rollon maoy napiling imports gikan sa barangay Punta Princesa (FYA) nga gitugotan nga makaduwa alang sa Camansili team ug wala nila pakyasa ang ilang coach nga si Trinidad dihang ila dayong gidabo-dabohan ang ilang karibal apan ang ilang gipakitang teamwork maoy yawe sa ilang kadaugan.

Igo lang untang naglabaw ang Camansili og usa ka lugas, 81-80 sa kataposang 2:30 ang oras sa duwa apan nakapasulod og back-to-back triples si Medalle aron daling mainat ang labaw ug wala na makarekober ang ilang kontra.

Si Manny Alinton maoy nangu sa mga batan-ong taga sitio Callejon sa iyang 28 puntos.

Puntos matag usa:

Camansili (100)— Medalle 30, Rollon 25, Talas 17, Lucernas 8, Dela Cerna 7, K. dela Cerna 6, Ylanan 3, Baculi 2.

Callejon (86)— Alinton 28, Tanciase 17, Hementisa 9, Abella 7, Uy 7, Estinoso 6, Lobingco 5, Baluyot 5, Castro 3.  (BANATSPORTS)