USC naka-una
CEBU, Philippines - Usa na lang ka daog ang kinahanglanon sa University of San Carlos (USC) Warriors aron pormal na nilang sakmiton ang third place trophy sa 13th Cebu Schools Athletic Foundation Inc. (CESAFI) men's basketball tournament.
Kini human makauna'g daog ang Warriors pinaagi sa pag-ihaw sa Jaguars sa iskor nga 82-72 sa Game-1 sa ilang "best-of-three" series alang sa ikatulong puwesto kagabii didto sa Cebu Coliseum.
Mahimo na nga haruson sa Warriors ang Jaguars sa Game- 2 unya sa Huwebes.
Ning pagsuwat, gahub na kaayo ang sulod sa coliseum nga madungog sa gawas tungod sa finals "rematch" tali sa defending champion Southwestern University (SWU) Cobras ug sa University of the Visayas (UV) Green Lancers nga padayong nagkumbati sa Game-1 sa ilang "best-of-five" series.
Kagabii maoy labing maayong duwa nga gipakita ni Cameroonian recruit Ahmed Salihou kay gawas nga siya maoy topscorer sa Warriors sa iyang 21 puntos, daghan sab kaayo siya'g nahimong rebounds ug ingon man mga tapal.
Bun-og sab kaayo si Salihou tungod kay pisikal kaayo ang depensa batok kaniya sa ilawom.
Si Ian Ortega midugang og 13 puntos alang sa Warriors, samtang si Nico Magat miamot og 10 puntos.
Si Christian Parker maoy nagpasiugda sa rally sa Jaguars sa third period aron hinay-hinay nga mapapas ang ilang 20 puntos nga biya, 25-45 sa tunga-tungang bahin sa maong kuwarter.
Miposa si Parker og 20 puntos aron pangulohan ang naparot nga Jaguars, samtang ang iyang maguwang nga si Matthew, kinsa nakalugar sab og pamuntos sa fourth period, mihakot og 16 puntos.
Si Rendell Senining milawog og 10 puntos ug si James Regalado, kinsa na-foul out sa maong duwa, igo lang nakaamot og siyete puntos alang sa Jaguars.
PUNTOS MATAG USA
USC (82) - Salihou 21, Ortega 13, Magat 10, Plata 9, Amin 9, Rabat 8, Que 5, Guardiario 3, Romaguera 3, Adlawan 3, Lim 2
USJ-R (72) - C. Parker 20, M. Parker 16, R. Senining 10, Tabaloc 9, Regalado 7, Sanchez 3, C. Senining 2 (BANAT BALITA)
- Latest
